Мюнхеннинг «Бавария» жамоаси ҳужумчиси Томас Мюллер Чемпионлар лигаси 1/4 финалидан ўрин олган «Интер»га қарши илк учрашувдаги (1:2) мағлубиятдан сўнг ўз фикрларини билдирди. Футболчининг фикрича, бу қарама-қаршиликда ҳали ҳеч нарса ҳал бўлмаган.

«Биз ҳисобни тенглаштиришга муваффақ бўлдик, кейин эса яна тўп ўтказиб юбордик. Буни таҳлил қилишимизга тўғри келади. Менимча, бундан ҳам яхшироқ ўйнашимиз мумкин эди. Бироқ футболда барчасини голлар ҳал қилади. Бу ўйинда биз кўрган футболнинг шафқатсизлиги ҳақида гапиришим шарт эмас. Жангнинг фақат ярми ортда қолди. Биз бошқа натижа бўлишини кутгандик, лекин ҳали ҳеч нарса йўқолмаганини яхши тушуниб турибмиз», — деди Мюллер УЕФА расмий сайтига берган интервюсида.

Эслатиб ўтамиз, «Бавария» – «Интер» ўйини Мюнхендаги «Арена Мюнхен» стадионида бўлиб ўтди ва унда миланликлар 2:1 ҳисобида ғалаба қозонди.