Бразилияда World Boxing шафелигида ўтказилаётган жаҳон кубоги баҳслари давом этмоқда.

Ўзбекистон эркаклар миллий жамоаси илк бор иштирок этаётган ушбу турнирда вакилларимиз иккинчи кунни ҳам йўқотишларсиз ўтказишди.

-60 кг вазн тоифасида Мадияр Данияров италиялик Мишел Балдассини 4:1 ҳисобида мағлубиятга учратиб кейинги босқичга йўл олди.

Иккинчи жангда эса -50 кг вазндаги Асилбек Жалилов қозоғистонлик Нурзат Онгаровга ҳеч қандай имконият қолдирмади – 5:0.

Учинчи жангда эса Акмалжон Исроилов ҳам -85 кг вазнда кейинги босқич масаласини ҳал этди. Ўзбекистонлик боксчи бу йўлда швецариялик Леонид Беришани мағлубиятга учратди.

Бугун, 2 апрелдан 3 апрелга ўтар кечаси яна 4 нафар ўзбек боксчиси рингга кўтарилади. Жанглар Тошкент вақти билан соат 22:00 дан старт олади.

Жуфтликлар билан танишинг:

-55 кг: Миразизбек Мирзахалилов - Николас Павлик (Польша) 23:15

-70 кг: Иқболжон Холдаров - Одел Камара (Англия) 00:00

-65 кг: Асадхўжа Мўйдинхўжаев - Юри Рейс (Бразилия) 03:00

-80 кг: Жавоҳир Умматалиев - Робби Гонсалес (АҚШ) 04:00

Маълумот учун, Жаҳон кубогига 19 давлатдан 130 дан ортиқ боксчилар ташриф буюрган. Жанглар Фос-ду-Игуасу шаҳрининг «Rafain Palace Hotel» меҳмонхонасида ташкил этилмоқда. Бундан олдин ушбу меҳмонхона Бразилия миллий бокс чемпионатларига мезбонлик қилган.

Эслатиб ўтамиз, турнирнинг дастлабки кун баҳсларида ҳам Ўзбекистоннинг уч нафар вакили иштирок этиб, учала боксчи ҳам ўз жангларида ғалабага эришди. Баҳслар 6 апрелгача давом этади.