1 апрел санасидан Бразилияда World Boxing шафелигида ўтказилаётган жаҳон кубоги баҳсларига старт берилди.

Ушбу турнирда бокс бўйича Ўзбекистон эркаклар миллий жамоаси илк бор иштирок этмоқда. Турнир эркаклар ва аёллар ўртасида ҳам 10 та вазнда бўлиб ўтади. Баҳслар 1-6 апрел кунлари ўтказилади.

Турнирнинг дастлабки кун баҳсларида Ўзбекистоннинг уч нафар вакили иштирок этиб, учала боксчи ҳам ўз жангларида ғалабага эришди.

Жумладан, Миразизбек Мирзахалилов кунни ғалаба билан бошлаб берди. Боксчимиз -55 кг вазнда бўлиб ўтган баҳсда швециялик Небил Ибраҳимни 5:0 ҳисобида мағлубиятга учратди.

Иккинчи жангда эса -70 кг вазн тоифасидаги Иқболжон Холдаров полшалик Дамиан Дуркачни 5:0 ҳисобида мағлуб этди.

Учинчи баҳсда эса Жавоҳир Умматалиев -80 кг вазнда италиялик Алфред Коммей устидан ғалаба қозонди.

Сешанбадан чоршанбага ўтар кечаси ўзбекистонлик боксчиларни яна учта жанг кутиб турибди.

Ўзбекистонлик боксчилар иштирокидаги бугунги жуфтликлар билан танишинг:

23:15. -60 кг: Мадияр Данияров - Мишель Бальдасси (Италия)

03:30. -50 кг: Асилбек Жалилов - Нурзат Онгаров (Қозоғистон)

04:45. -85 кг: Акмалжон Исроилов - Леонид Бериша (Швейцария).

Маълумот учун, Жаҳон кубогига 19 давлатдан 130 дан ортиқ боксчилар ташриф буюрган. Жанглар Фос-ду-Игуасу шаҳрининг «Rafain Palace Hotel» меҳмонхонасида ташкил этилмоқда. Бундан олдин ушбу меҳмонхона Бразилия миллий бокс чемпионатларига мезбонлик қилган.