13 июн куни Жиззах шаҳридаги «Марказий» стадионида «Динамо» ҳамда «Олимпик» жамоалари ўртасида Суперлига 6-турининг қолдирилган учрашуви бўлиб ўтди. Ўйинда Темир Кападзе шогирдлари қўшиб берилган вақтда урилган гол эвазига ҳақли ғалабани қўлга киритишди.

Шу куни «Олимпик» ўйинни бир неча асосий футболчиларсиз бошлади. Масалан, асосий ҳужумчи Алишер Одилов ва марказнинг асосий вакили Абдурауф Бўриев иккинчи бўлимда ўйинга қўшилди. Айниқса Одиловнинг майдонга тушгани ўйин картинасини ўзгартириб, «Олимпик» ҳужумларини хавфлироқ қилди. Умуман олганда, шу куни жисмоний жиҳатдан яхшироқ бўлган, кўпроқ югурган ва камроқ хато қилган «Олимпик» муносиб ғалабани қўлга киритди. Самарқанд жамоасининг 9 ўйиндан иборат мағлубиятсиз серияси эса бузилди.

Абдурауф Бўриевнинг дисквалификацияси

Ўйин давомида бир қизиқ ҳолат кузатилди. 10-турда, яъни битта олдинги учрашувда «Навбаҳор»га қарши ўйинда майдондан четлатилган «Олимпик» футболчиси Абдурауф Бўриев «Динамо»га қарши ўйинда 68-дақиқада захирадан майдонга тушди. Биз журналистлар Бўриевнинг дисквалификацияси бекор қилингани, «Навбаҳор» билан ўйинда унга кўрсатилган иккинчи сариқ карточка бекор бўлганини ўйин бошланишидан бироз олдин, қайдномани кўриб билдик. Бу ҳақда трансляциядаги шарҳда ҳамкасбларимиз ҳам айтишибди.

Аммо «Динамо» жамоаси Бўриев ўйинда майдонга тушишидан бехабар бўлган экан. Бу ҳақда жамоа бош мураббийи Вадим Абрамов ўйиндан кейинги матбуот анжуманида айтди. Шу боис Бўриевнинг майдонга тушгани ва дисквалификацияси бекор бўлгани билан боғлиқ саволлар юзага келди. Биз ҳолат ҳақида кичик суриштирув ўтказдик.

Чалкашлик нимада ўзи?

Демак, бошидан бошлаймиз. 30 май куни «Навбаҳор» ва «Олимпик» 10-тур доирасида тўқнашди. Ўйиннинг 90+4-дақиқасида «Олимпик» сардори Абдурауф Бўриев рақиб ҳужумини тўхтатиб қолгани учун биринчи марта оголантирилди. 90+10-дақиқада бош ҳакам Раҳимбек Каримов «Олимпик» сардори Бўриевга яна бир марта сариқ карточка кўрсатиб, уни майдондан четлатди.

Бу иккичи сариқ мухлислар учун ҳам ғалати туюлганди. «Олимпик» мураббийлар штаби ўйиндан кейиноқ бу карточкани бекор қилиш бўйича ариза бергач, эксперт ҳакамлар комиссияси ҳакам иккинчи сариқ карточка нотўғри кўрсатилган деб топади. Комиссия қарори 4 июнда маълум бўлган ва Tribuna.uz'да ҳам эълон қилинганди.

Аммо қайсидир футболчининг дисквалификацияси бекор бўлиш-бўлмаслигини Ўзбекистон футбол ҳакамлари маркази эксперт-ҳакамлар комиссияси эмас, ЎФА қошидаги Тартиб-интизом қўмитаси ҳал қилади. Бу қўмита эса Абдурауф Бўриевнинг қизил карточкаси бекор бўлгани ҳақида «Динамо» – «Олимпик» ўйини бошланган 13 июн соат 20:00 гача эълон қилмаганди. Шу сабаб Бўриев майдонга тушмайди деб ўйлаган «Динамо» мухлисларида ҳақли савол пайдо бўлди.

Қизил карточка чиндан бекор бўлган

Биз бу ҳолат бўйича кўплаб мутахассисларга алоқага чиқдик. Бизга маълум бўлишича, Бўриевнинг «Навбаҳор» билан ўйинда олган иккинчи сариқ карточкаси ва дисквалификацияси 11 июнда – Жиззахдаги қолдирилган ўйиндан икки кун олдин бекор қилинган.

ПФЛдаги ҳамкасбларимизнинг айтишича, ўйинларда майдонга тушиши тақиқланган футболчилар рўйхати электрон базага жойлаштирилади. Комиссар базада дисквалификация бор футболчилар майдонга тушмаслигини, қайдномага ҳам киритилмаслигини таъминлайди. Яъни, мантиқан олиб қаралса, Бўриевнинг қизил карточкаси бекор бўлганидан «Динамо» – «Олимпик» ўйини комиссари хабардор бўлган. Акс ҳолда футболчи майдонга туша олмаган бўларди.

Унда муаммо нимада дейсизми? Гап шундаки, ЎФА Тартиб-интизом қўмитаси Бўриевнинг дисквалификацияси бекор бўлгани ҳақида «Динамо» – «Олимпик» ўйини тугаганидан бир кун ўтиб, 14 июн куни эълон қилди. Шу ўринда савол туғилади: футболчининг дисквалификацияси бекор бўлгани ўйингача ҳеч қаерда эълон қилинмаса, Тартиб-интизом қўмитаси қарори ҳуқуқий кучга эгами? Ҳар ҳолда бутун бошли қонунлар ҳам расмий ОАВда ёки расмий сайтларда эълон қилингачгина кучга кирган ҳисобланади. Балки биз бу ерда қандайдир детални эътибордан четда қолдиргандирмиз. Агар шундай бўлса, тегишли ташкилотлар, хусусан, ЎФАдан бу борада жавоб кутиб қоламиз.

Ўткир Жалолхонов, Kun.uz журналисти