Хабарингиз бор, бу йилги пролигада интрига анча ортиб кетди. Сабаби, Суперлига йўлланмаси учун курашаётган клублар кўпайиб қолди. Бу йил про лигада дебютини ўтказаётган ва ўз олдига жиддий мақсадларни қўйган «Каттақўрғон» жамоасида яқинда мураббий алмашди.
Мавсум аввалида Ёрқин Назаров бош мураббий сифатида ишга киришганди. Бироқ 7-турдан сўнг мураббий истеъфога чиқарилди ва ўрнига россиялик Юрий Уткулбаев таклиф қилинди. Назаров ишдан кетишини кутмаган экан ва буни у қуйидаги суҳбатда айтиб ўтди.
- Мавсум бошида «Каттақўрғон» клуби бош мураббийи сифатида иш бошлагандингиз. Бироқ чемпионат ярмига келиб истеъфога чиқдингиз. Аслида нима бўлди?
- Биринчидан, мени чақиришган пайтда «Каттақўрғон» ҳали ҳеч кимга танилмаган жамоа эди. «Локомотив»да ишлаб тургандим. Клуб менга яна шартнома таклиф қилаётганди. Лекин «Каттақўрғон» келинг деб туриб олди, Суперлигага чиқиш мақсади қўйилганини айтишди. Фикримча, таркиб бўйича ёмон жамоа тузмагандик. Бизни ишдан бўшатиш учун ўйинларда ҳам у қадар катта муаммо кўрмаётгандим. Биринчи ўриндаги жамоа билан фарқимиз 3 очко эди. Битта ютуқ бўлса биринчи ўринга чиқиб оладиган ҳолатда тургандик. Тўсатдан бошқа мураббий олиб келишди. Тўғрисини айтсам, ўзим ҳам тушунмай қолдим. Кубок ўйинларини баҳона қилишаётган бўлса, унда ҳеч қанақа мақсад йўқ эди.
Яна натижага қарайдиган бўлсак, пролигада 7 та ўйиннинг 5 тасини нолга ўйнагандик. Бизга фақат «Шўртан» билан «Орол» гол уришганди. Олдинги чизиқда қандайдир муаммолар бўлаётганди. Гол кам ураётгандик. Охирги ўйинимиз – «Яйпан»га қарши баҳсни оладиган бўлсак, 17-дақиқагача 5 та имкониятимиз бўлган. 2-3 марта яккама-якка чиқилган. Уролмаган, нотўғри тепган, дарвозабон қайтарган. Озгина камчилигимиз - голларимиз кам эди. Бу янги жамоа эди ва ҳаммаси бирданига бўлавермасди. Аввало нолга ўйнаб, ҳимоя ва яримҳимояни тартибга келтириб, аста-секин жамоа ўзига келаётганди. Лекин кутилмаганда шунақа қарор чиқариб қўйишди. «Каттақўрғон» раҳбариятига сабр етмади. Ҳар доим хайрлиси бўлсин дейман.
- Ўрнингизга россиялик мутахассис жалб қилинди. Кетганингиздан кейин собиқ клубингизни кузатишга иштиёқингиз бўляптими?
- Қизиқ томони, бу мураббий ҳимояланиб ўйнар экан. Ҳолбуки, бизда ҳимояда муаммо йўқ эди. Шундоқ ҳам биз пролигада энг кам гол ўтказган жамоа эдик – 3 та холос. Майли, энг асосийси, жамоани тузиб бергандим. Менимча, футболчиларни 70 фоизи мен бормаганимда келишмасди. Рости, ҳозир жамоани кузатмаяпман.
- Пролигада ишлаб кўрдингиз ва у ернинг ҳавосини биласиз. Суперлига учун курашаётган клубларни имкониятларини қандай баҳолайсиз?
- Барча етакчиларни Суперлигага чиқишга имконияти бор. Барча позицияларда яхши футболчилар йиғилган. Пролигани ҳам, Суперлигани ҳам кўрдик. Суперлигада ишлаш осонроқ. Сабаби, у ерда барча ташкилий ишлар жойига қўйилган. Лекин бу йилги пролигани яхши тарафи, 4-5 та жамоа рақобатлашяпти, бир-бирига яқинроқ ва яхши жамоалар шакллантириляпти. 1-ўринга чемпионат охиригача жиддий кураш кечяпти.
- Кейинги режаларингиз қандай?
- Ҳозирги пайтда оилавий ишлар билан шуғулланяпман. Бундан ташқари, оилавий тадбиркорликни бошлаб қўйгандик, шуни ҳужжат ишларини қилиб юрибман.
- Яна мураббийликка қайтиш режангиз борми?
- Мураббийликка қайтиш? Билмадим. Ҳозирги кунда бу ҳақида ўйламаяпман. Уйдаги ишлар кўпайиб кетган экан, шу ишлар билан бандман. Мураббийлик тўғрисида ҳеч нарса ўйлаётганим йўқ.
- Афтидан, кутилмаганда ишдан кетганингиз кайфиятингиз ва иштиёқингизга таъсир кўрсатган кўринади...
- Айтганимдек, ҳозирча мураббийликни ўйлаётганим йўқ. Таклиф бўлса ҳам уни энди яхшилаб ўрганиб чиқиш керак. Тез ишга ўтиб, шартномага қўл қўйиб, тезда ишдан кетиш ҳолатини яна бошимдан ўтказгим келмаяпти. Мураббийлик ҳақида ўйлашга вақтим ҳам бўлмаяпти. Тўғрисини айтсам, ҳозирча иштиёқ йўқ.
Шуҳратбек Жўраев суҳбатлашди.
