Иван Дичко украиналик Александр Усик британиялик Даниэл Дюбуани мағлуб эта олишига ишонмоқда.
Олимпиаданинг икки (2012, 2016) карра бронза медали соҳиби, уч карра (2011, 2013, 2015) жаҳон чемпионати совриндори қозоғистонлик супероғир вазнли Иван Дичко Sports24.kz мухбири билан суҳбатда Александр Усикнинг Даниэл Дюбуага қарши жанги ҳақида фикрини билдирди.
«Тўғрисини айтсам, боксга унчалик яхши тушунмаслигимни англаб етганман – қачон тахмин қилсам, ҳаммаси аксинча бўлиб чиқади. Айниқса, бу Александр Усик жангларига тааллуқли. У Мурат Гассиевга қарши жанг қилганида, мен Гассиев ғалаба қозонади деб ишонган эдим. Лекин Усик ютиб чиқди. Кейинчалик Усик Тайсон Фюрига қарши рингга чиққанида ҳам, Фюри ғалабага эришади деб ўйлагандим. Аммо Усик икки марта кучлироқ бўлиб чиқди. Даниэл Дюбуа ҳозир айни ўзининг энг яхши формасида – кучли, бақувват йигит, шуларни таҳлил қилиб, тахмин қилишда уни танлашим мумкин эди. Аммо одатда тахминларим ўзини оқламаслиги сабабли ҳам Усик ғалаба қозонади, у рингда рақибидан ақллироқ, қизиқарлироқ кўринмоқда» - деди Дичко.
Эслатиб ўтамиз, Александр Усик ва Даниэл Дюбоа ўртасидаги биринчи жанг 2023 йил август ойида Полшада бўлиб ўтган ва Усикнинг тўққизинчи раунддаги техник нокаути билан якунланганди. Реванш жанг 2025 йил 19 июл куни Лондондаги «Уэмбли» стадионида бўлиб ўтади.
Маълумот ўрнида, бу жанг Дюбуа учун жаҳон бокси элитасига сенсацион тарзда қўшилиш имконияти ҳисобланади. Ёш бўлишига қарамай, британиялик боксчи кучли зарбалари ва ҳужумкор услуби билан танилган, шунингдек, WBA версияси бўйича вақтинча жаҳон чемпиони унвонини ҳам қўлга киритган.
Аввалроқ, Александр Усик 2024 йилнинг энг яхши боксчиси деб тан олинганди. Иван Дичко эса 2012 йилги Лондон Олимпиадаси ва 2016 йилги Рио Олимпиадасида бронза медали соҳиби бўлган.
