«Ланс» бош мураббийи Пер Саж яқин вақт ичида «Кристал Пэлас» бошқарувини қўлга олиши мумкин. Бу ҳақда инсайдер Фабрицио Романо хабар берди.
Манба маълумотига кўра, 47 ёшли мутахассис Лондон клуби билан шартнома имзолашга розилик берган. Ҳозирда томонлар келишувнинг якуний тафсилотларини ҳал қилмоқда.
«Кристал Пэлас» аввалроқ Оливер Гласнер билан хайрлашганидан сўнг янги бош мураббий қидираётган эди.
Қайд этилишича, Саж ўтган мавсум «Ланс» билан муваффақиятли натижаларга эришган. Жамоа Франция чемпионатида иккинчи ўринни эгаллаб, мамлакат кубогида ҳам ғолиб чиққан.
Эслатиб ўтамиз, Пер Саж мураббийлик фаолияти давомида «Лион» ва «Ланс» клубларида ишлаган.
Маълумот учун, «Кристал Пэлас» ўтган мавсум УEФА Конференциялар лигасида ғолиб чиққан эди.
