Тожикистон миллий жамоасининг собиқ бош мураббийи – Петр Сегртни яхши эслайсиз. Унинг мураббийлигида тожик футболи олдинга қадам ташлади. Сегртнинг ташқи кўриниши туфайли уни «хорватиялик Эйнштейн» ёки «германиялик Эйнштейн» деб ҳам аташади.
Сегрт ўзбек футболини ҳам яхши билади. Шу боис унинг учун доимо бизнинг футболимиз жуда қизиқарли бўлиб келган.
Германияда истиқомат қилаётган мутахассис Тожикистондан кетганидан бери ҳали бирор жойда кўриниш бергани йўқ. Tribuna.uz журналисти эса у билан боғланиб, бир қатор саволларга жавоб олди. У терма жамоамиз ҳақида мотивацияга бой фикрлар билдиргани эътиборга молик.
- Жаноб Сегрт, Тожикистон миллий жамоасини тарк этганингиздан бери мураббийликка қайтганингиз йўқ. Бунинг сабаби нимада?
- Биласизми, мен бир ишдан бошқасига осонликча ўтадиган мураббийлардан эмасман. Чунки мен жамоага юрагимни, бутун вақтимни, куч ва ҳиссиётларимни бераман. Қолаверса, футболчилар, халқ ва бутун мамлакатга 100 фоиз ўзимни бағишлайман. Шунинг учун ҳам бундан воз кечиш анча вақт талаб қилади. Мени ўтмишимга қарасангиз, янги лойиҳалар бошлаш учун маълум муддат кетганини кўрасиз.
Тожикистон мен учун алоҳи ўрин тутган. Тожикистон халқи, мамлакат футбол федерациясига бўлган ҳурматим ҳеч қачон ўзгармайди.
- Дарвоқе, яқинда сизни яна Тожикистон жамоасига қайтишингиз мумкинлиги ҳақида ҳам эшитгандим. Бу ростмиди?
- Бу ҳақида бир қанча муҳокамалар бўлган. Лекин мен ўйлайманки, Тожикистонда қилган ўзгаришларим билан тожик футболини юқори чўққига олиб чиқдик. Биз биргаликда ажойиб муваффақият қозондик. «Осиё Кубоги-2024» дан сўнг мен бироз танаффус қилишга қарор қилдим. Тожикистонга эса келажакда зафарлар тилайман. Мамлакат миллий ўйинчилари ва тожик халқи ҳаётимда дўст бўлиб қолади ва улар билан бир-биримизни доимо ҳурмат қилувчиларга айланганмиз. Лекин энди икки томон учун ҳам олдинга қараш вақти келди.
- Сизни германиялик «Эйнштейн» деб ҳам аташади. Бу ибора сизга ёқадими?
- Мен буни қабул қилишим керак (кулади).
- Яқинда бошланадиган жаҳон чемпионатидан нималарни кутяпсиз? Қайси миллий жамоаларга мухлислик қиласиз?
- Дастлаб шуни айтишим керакки, бу жаҳон чемпионати аввалгиларидан анча фарқ қилади ва унда битта аниқ фаворитни кўрмаяпман. Испания, Франция, Англия, Португалия, Германия ҳамда Жанубий Американинг Аргентина ва Бразилия каби миллий жамоалари албатта асосий фаворитлар ҳисобланади. Бироқ ҳаво ҳарорати ва ўйинлар ўтказиладиган шаҳарлардаги улкан масофалар жамоалар учун жиддий синов бўлади. Шу сабабли турнир бошланишидан олдин аниқ башорат қилиш жуда қийин. Бундан ташқари, йирик футболчиларнинг жароҳатлари ҳам чемпионлик пойгасига катта таъсир кўрсатади. Менинг фикримча, Францияда имкониятлар энг юқори. Чунки уларнинг нафақат асосий таркиби, балки 26 нафар футболчисининг деярли барчаси юқори савияга эга. Аммо Испания ва Португалия ҳам турнирни жуда муваффақиятли ўтказиши мумкин. Менинг яширин фаворитим эса Аргентина.
- Табиийки, Ўзбекистон миллий жамоамизни яхши биласиз. Мундиалда дебютант сифатида қатнашадиган жамоамиздан нима кутяпсиз?
- Менимча, бу Осиё жамоалари учун кутилмаган натижаларга бой жаҳон чемпионати бўлиши мумкин. Негаки, сўнгги 12 йил ичида Осиё футболи тараққиёти жуда катта ўсишга эришди. Япония, Эрон, Иордания, Жанубий Корея ва Ўзбекистон бунга мисолдир.
Мен ишонаманки, Ўзбекистон ҳозирги пайтда ушбу жаҳон чемпионати учун жуда қизиқарли ва кучли миллий жамоага эга. Лекин энг муҳим омил – турнирни қандай бошлаш! Биринчи ўйин Колумбияга қарши бўлади. Агар Ўзбекистон ғалаба қозонса ёки ҳеч бўлмаганда бир очко олса, кейинчалик ҳамма нарса бўлиши мумкин. Назаримда, энг муҳими ўзига ишонч билан ўйнаш. Ўзбекистон ҳужумкор футбол намойиш қилиши керак. Буни Ўзбекистон футболчиларининг ДНКси ва футбол маданиятининг бир қисми деб ҳисоблайман. Жамоа юқори прессинг қўллаши, рақибга эркин ўйнаш имконини бермаслиги ва имкон қадар тезкор ҳужумлар билан гол уришга интилиши керак. Эсланг, биз Тожикистон билан қандай қилиб кучли жамоаларни ҳайратда қолдирган эдик. Ўша пайтда ҳам олдинга интилиб ўйнаганмиз. Ҳозирги Ўзбекистон таркибида ҳам юқори савиядаги футболчилар етарли. Шунинг учун менинг мураббий сифатидаги фикримга кўра фақат ҳимояда «ўтириш» Ўзбекистон учун муваффақиятга элтадиган йўл эмас. Ўзингизга ишонинг ва ўзбекча ҳужумкор футболни намойиш этинг. Мен Ўзбекистон фақат жаҳон чемпионатига чиқиш билангина чекланиб қолмайди, деб ишонаман. Камида плей-офф босқичига чиқиши мумкин. Ахир Марокаш ҳам охирги жаҳон чемпионатида сенсацион тарзда 4-ўринни эгаллаган эди.
Яна шуни алоҳида қўшимча қилмоқчиманки, Осиёда айнан Ўзбекистон ҳукумати футболга катта миқдорда инвестиция киритмоқда. Шунингдек, Ўзбекистондаги ёшлар футболини ривожлантириш тизими ҳам Осиёда энг тез тараққий этаётган йўналишлардан бири ҳисобланади. Шу боис Ўзбекистон футболининг келажаги жуда истиқболли кўринади.
Жаҳон чемпионатидан сўнг Ўзбекистон дунёга нималар намойиш қила олишини кўрамиз. Чунки юқори даражадаги футбол фақат футболчиларнинг сифати ва истеъдодига боғлиқ эмас. У шунингдек, кучли раҳбарлик ҳамда мураббийнинг аниқ футболга қараши ҳамдир. Фикримча, Ўзбекистонда катта имконият бор ва мен Ўзбекистон ўзининг кучли, агрессив ва ҳужумкор ўйини билан дунёни ижобий маънода ҳайратда қолдиришига умид қиламан.
Шуҳратбек Жўраев суҳбатлашди.
