Франция миллий жамоаси бош мураббийи Диде Дешам Шимолий Ирландияга қарши ўртоқлик баҳсида хет-трик қайд этган Майкл Олисенинг ўйинига юқори баҳо берди.
Французлар Жаҳон чемпионатига тайёргарлик доирасидаги назорат учрашувида Шимолий Ирландияни 3:1 ҳисобида мағлуб этди. Жамоанинг барча голларига айнан Олисе муаллифлик қилди.
«Айнан шундай Олисе бизга керак бўлади. Майкл «Бавария» ва миллий жамоадаги мавсумидан кейин янада ажралиб турмоқда. У катта ютуқларга эришди ва ўзига бўлган ишончи юқори.
Бундан ташқари, у жамоа учун меҳнат қилишни ҳам билади. Бу эса жуда муҳим жиҳат», — деди Дешам Radio France Internationale нашрига.
Эслатиб ўтамиз, Франция миллий жамоаси 2026 йилги Жаҳон чемпионати иштирокчиси ҳисобланади.
Маълумот учун, французлар мундиалнинг I гуруҳида Сенегал, Ироқ ва Норвегия миллий жамоаларига қарши баҳс олиб боради.
