АҚШда бўлиб ўтадиган футбол бўйича Жаҳон чемпионати-2026 очилиш ўйини шанба, 13-июнга ўтар кечаси, Тошкент вақти билан соат 06:00да бошланади.
Ўйин Инглвуддаги «Соу-Фай» стадионида бўлиб ўтиши режа қилинган. Майдонда АҚШ ва Парагвай миллий жамоалари ўзаро рўбарў келади.
Маълумот учун, мусобақада 48 жамоа иштирок этади, улар 12 гуруҳга бўлинган бўлиб, ҳар бир гуруҳда 4 тадан жамоа бор. Учта мезбон мамлакат (АҚШ, Канада, Мексика) автоматик равишда иштирок этиш ҳуқуқига эга бўлган бўлса, қолган жамоалар саралаш босқичидан ўтишди.
Эслатиб ўтамиз, гуруҳ босқичи 11 июндан 27 июнгача давом этади. Жамоалар гуруҳда бир-бири билан айланма тарзда (ҳар бири учта ўйин) ўйнайдилар. Ҳар бир гуруҳдан энг яхши икки жамоа плей-офф йўлланмасига эга чиқади, шунингдек, учинчи ўринни эгаллаган саккизта энг яхши жамоа ҳам иштирокини давом эттиради. Мусобақада жами 104 та ўйин ўтказилади — бу жаҳон чемпионатлари учун рекорд ҳисобланади.
