Superliga 15-tur doirasidagi «Mash'al» – OKMK (0:1) qarama-qarshiligidan so'ng, mehmonlar bosh murabbiyi Mirjalol Qosimov o'z fikrlari bilan o'rtoqlashdi:
«Oxirgi o‘yinlarda g‘alaba qozona olmayotgandik, shu bois yigitlarda tushkunlik kayfiyati bor edi. Lekin bugun ushbu noxush seriyaga barham berib qiyin g‘alabani qo‘lga kiritdik. Issiq ob-havo har ikki jamoaga salbiy ta'sir ko‘rsatdi.
«Mash'al» jamoasini yaxshi bilamiz, tartibli o‘yin namoyish qiladi. Raqib bizga qarshi besh nafar himoyachi bilan o‘yinni boshladi, shunga qaramadan standart vaziyatdan gol urishga erishdik. Bahs taqdirini birinchi bo‘limdayoq hal qilishimiz mumkin edi, chunki ko‘plab vaziyatlarga ega bo‘ldik. Agar uchta imkoniyatdan bittasini urganimizda hammasi yanada osonroq bo‘lardi.
Ikkinchi bo‘limda ham yaxshi o‘yin ko‘rsatdik. Darvozabonimiz muqarrar goldan qutqardi. Endi qisqa tanaffusga chiqamiz va shundan so‘ng ikkinchi davraga hozirlikni boshlaymiz. Ikkinchi davrada o‘zimizni ko‘rsatib, avvalgi maqomimizga qaytmasak bo‘lmaydi. Hammasiga mehnat orqali erishishga harakat qilamiz.
Bitta maqol bor: osilsang baland dorga osil. Biz ham shunga harakat qilamiz. Men qaerda ishlashimdan qat'iy nazar doim yuqori maqsadlarni qo‘yganman.
Muborakda o'ynaganimga ham 20 yil bo‘libdi. O‘sha yillari «Mash'al»dan taklif bo‘lgandi. Ko‘proq futbol o‘ynashni xohlagandim, ammo taqdir taqozosi bilan 35 yoshda tugatishga majbur bo‘lganman. Faoliyatimni O‘zbekistonda tugatishni xohlaganman. Futbolga nihoyatda qiziquvchi kishilar meni «Mash'al»ga chaqirishgandi. O‘sha yil «Mash'al» chempionatni ikkinchi o‘rinda tugatgan. Muborakda uch yil yilni o‘tkazdim va bu men uchun katta tajriba bo‘lgan deya olaman.
Jarima zarbalardan qoyilmaqom qilib foydalanish uchun Alloh bergan iqtidor ham bo‘lishi kerak. Ammo iqtidorim yo‘q ekan deb qarab turish ham noto‘g‘ri. Futbolchi baribir ishlashi kerak. Buning ham o‘ziga yarasha mehnati bor. O‘xshamasa ham ishlayverish kerak. Rossiyaga ketganimda Gadji Muslimovich Gadjiev men bilan jarimalar ustida ko‘p ishlardi. U kishidan ko‘p narsa o‘rganganman. Koptogimiz unchalik zo‘r bo‘lmagan. Hozirgi to‘plar bilan nimalar qilsa bo‘ladi-ya»,– dedi mutaxassis.
