«Ал Ҳилол» бош мураббийи Жорже Жезуш эндиликда Бразилия миллий жамоаси бош мураббийлигига асосий номзод сифатида кўрилмоқда. Бу ҳақда Globo портали хабар берди.

70 ёшли португалиялик мутахассиснинг июн ойида Саудия Арабистонининг «Ал Ҳилол» клуби билан шартномаси якунига етади. Бразилия футбол конфедерацияси (CBF) Карло Анчелотти билан келишув амалга ошмаганидан сўнг бор эътиборини Жезушга қаратди.

Маълумотларга кўра, «Реал» клуби Анчелоттини лавозимидан бўшатганидан кейин унга товон пули тўлаши кутилган эди. Бироқ Анчелотти CBF билан оғзаки келишувга эришганини билган «қироллик клуби» президенти Флорентино Перес ортиқча пул тўлашдан бош тортди.

Шу сабабли, Бразилия футбол конфедерацияси Анчелотти билан музокараларни тўхтатган.