Эҳтимоли кам бўлса-да, эртагаёқ биз Англия чемпионини расман билиб олишимиз мумкин. Бунинг учун «Ливерпул» Лестерда ғалаба қозониши, «Арсенал» эса Ипсвичда мағлубиятга учраши керак бўлади. Албатта, АПЛ чемпионини аниқлаш вақт масаласи холос, бусиз ҳам дам олиш кунлари бизни ажойиб тўқнашувлар кутиб турибди. Англияда Чемпионлар Лигаси йўлланмаси учун муҳим баҳс бўлиб ўтса, Испанияда «Реал» чемпионлик умиди учун очко йўқотмаслиги шарт.
ЭВЕРТОН – МАНЧЕСТЕР СИТИ (19 апрел, 19:00)
«Манчестер Сити» айни дамда Чемпионлар Лигаси йўлланмасини тақдим этувчи 5-ўринни эгаллаб турган бўлса-да, ортда «Челси» ва «Астон Вилла» келмоқда ва ўртада атиги бир очколик масофа бор. Сўнгги олти турдаги ғалаба «шаҳарликларга» йўлланмани нақд қилади албатта, аммо «Эвертон» ва «Астон Вилла»га қарши кейинги ўйинлар нисбатан қийинроқ саналади ва бу ўйинларда очко йўқотмаслик ўта муҳим. «Эвертон»ни эса айниқса «Ливерпул» ва Манчестер жамоаларига қарши ўйинларда одатдагидан кўпроқ мотивацияга эга бўлишини ва чалиб қолишга уринишини жуда яхши биламиз.
Биринчи даврадаги «Этиҳад»да ўтган ўйинда ҳам ливерпулликлар муносиб қаршилик қилишган ва Манчестердан бир очко олиб кетишганди. Умуман агар ўзаро ўйинларга аҳамият берадиган бўлсак, «Эвертон» «Сити»га қарши уй ўйинларида 16 уринишдан 5 тасини ғалаба билан якунлаган. «Манчестер Сити» сўнгги йилларда АПЛда қанчалик гигемон бўлганидан келиб чиқсак, ёмон натижа эмас. Аммо жами ўзаро ўйинларни олсак, сўнгги 16 учрашувдан бери «Эвертон» «Манчестер Сити» устидан ғалаба қозона олмаяпти – 13 мағлубият ва 3 дуранг.
Яна бир қизиқ факт, «Эвертон» 1 февралдан буён ўз мухлислари қаршисида ғалаба қозона олмаяпти. Ўша ғалабадан сўнг Мойес шогирдлари 2 марта зафар қучишди, аммо ҳар иккиси ҳам сафар ўйинларида рўй берди. Айнан уй ўйинларига эътибор берилаётганининг сабаби, маълумки, келаси мавсумда «Эвертон» янги стадионга кўчиб ўтади. Шу билан «Гуддисон»да мезбонларнинг атиги 3 ўйини қолди – «Манчестер Сити», «Ипсвич» ва «Саутҳэмптон». Табиийки, жамоа сўнгги ўйинларни кўтаринки руҳда ўтказишни ва 133 йиллик тарихга эга бўлган маскан билан муносиб хайрлашишни истайди.
Таркибларга келадиган бўлсак, мезбонлар таркибида Мангаля, Калверт-Левин ва Линдстремларда жароҳат бор. Мангаля ва Линдстрем умуман мавсум охиригача сафдан чиқишган. Меҳмонлар сафида йўқотишлар кўпроқ – Стоунз, Аканжи, Аке, Холанд, Родри ва Эдерсонлар шерикларига ёрдам беролмайди.
Сўнгги пайтларда захирада қолаётган Абдуқодир Ҳусановнинг бу ўйинда қатнашиш эҳтимоли юқорироқ бўлиши керак. Чунки одатда «Эвертон» асосан узун пасларга ва тезкорликка урғу берган ҳолда қарши ҳужумлар уюштиради. Айниқса, жисмоний курашлар мезбонлар учун топ жамоаларга қарши ўйинларда асосий козир ҳисобланади. Шундан келиб чиқсак, айнан жисмоний имкониятлари бундай характердаги тўқнашувларга мосроқ бўлган Ҳусановга имконият берилишини тахмин қилсак бўлади.
АСТОН ВИЛЛА – НЮКАСЛ (19 апрел, 21:30)
«Астон Вилла» ҳафта ўртасида «ПСЖ»га қарши мавсумдаги энг яхши ўйинларидан бирини ўтказгани шубҳасиз. Рақибга босим ўтказиш, прессинг ва жисмоний курашлар ёрдамида Эмери йигитлари анча юлдузли таркибга эга бўлган меҳмонларни анча қийнаб қўйди, ҳатто камбэк қилинишига ҳам сал қолди. Қизиғи, худди шу услубда беназир бўлган бошқа жамоа – «Нюкасл»га қарши баҳс янада томошабоп бўлиши шубҳасиз.
Бунинг устига, турнир интригаси ҳам катта. «Нюкасл» айни дамда 3-ўринда кетаётган бўлса-да, жамоалар жуда зич жойлашган – икки мағлубият Хау шогирдларини ҳатто кучли бешликдан ҳам тушириб юбориши мумкин. «Астон Вилла» эса юқорида айтилганидек, йўлланма учун асосий даъвогарлардан бири. Ҳозир бирминҳэмликлар 5-ўриндаги «Манчестер Сити»дан 1 очко ортда бормоқда холос. «Вилла»нинг навбатдаги икки ўйини «Нюкасл» ва «Манчестер Сити» билан. Демак мана шу икки ўйин жамоанинг мавсумдаги тақдирига кўп жиҳатдан ойдинлик киритади. Ғалабалар жамоани пешқадамлар сафига киришига имкон берса, мағлубиятлар умуман курашдан чиқариб юбориши мумкин. Ҳар томонлама бемалол олти очколик баҳс деб таъриф беришимиз мумкин.
«Нюкасл» сафар ўйинларидаги натижалар бўйича ҳам АПЛ да учинчи кўрсаткични қайд этган. Фақатгина «Ливерпул» ва «Арсенал»да яхшироқ натижа холос. Аммо яна бир факт бор, «Астон Вилла» бу мавсум ўз уйида фақат бир марта мағлубиятга учраган холос. У ҳам бўлса 2-турда, ўз майдонидаги мавсумнинг илк ўйинида «Арсенал»дан ютқазишган. Умуман жамоанинг охирги ўйинларини оладиган бўлсак, «Вилла» сўнгги 11 ўйиндан атиги биттасини, Париждаги учрашувни бой берди ва қолган 10 учрашувни ғалаба билан якунлади. Ўз навбатида «Нюкасл»нинг ҳам сўнгги учрашувлари жуда кучли ўтган – қаторасига 6 ғалаба, сўнгги уч ўйин йирик ғалабалар билан тугади, бу учрашувларда «Нюкасл» 12 гол уриб, атиги битта ўтказиб юборди. Яъни ўзига яраша жуда яхши спорт формасида бўлган икки рақибнинг ўзаро баҳсига гувоҳ бўламиз. Дарвоқе, охирги 3 ўзаро ўйинда «Нюкасл»нинг қўли баланд келганини таъкидлаш керак. Биринчи даврадаги ўйинда ҳам 3:0 ҳисобида Хау шогирдларининг қўли баланд келганди.
Жароҳатлар борасида ҳам ҳар икки томондаям муаммолар деярли йўқ. Ласселс, Ботман, Холл каби футболчилар меҳмонларга ёрдам бера олишмаса-да, анчадан бери жамоа уларсиз ҳам ўйнашни ўрганиб олган. «Астон Вилла»да йўқотишлар бўлмаса-да, ҳафта ўртасидаги ЕЧЛ ўйинида берилган куч ўз сўзини айтиши мумкин. Тўғри, «Нюкасл» ҳам ўша куни «Кристал Пэлас»га қарши қолдирилган ўйинда майдонга тушди. Аммо биринчи таймдаёқ жавобсиз тўрт гол урган «Нюкасл» қолган дақиқаларни анча енгил режимда ўтказди.
МИЛАН – АТАЛАНТА (20 апрел, 23:45)
Еврокубоклардаги сўнгги натижалардан сўнг келаси мавсум Чемпионлар Лигаси учун Италиядан фақат тўрт жамоа қатнашадиган бўлди. Кучли тўртликдан 8 очкога ортда бораётган «Милан» учун йўлланмани қўлга киритиш деярли имконсиз ҳолга келиб қолганлиги ҳам шубҳасиз. Аммо айни дамда «Милан», айниқса, Консейсау учун жуда муҳим палла – жамоа ҳеч нарсага курашмаётган бўлса-да, ўйин услуби ва натижалари билан келаси мавсум учун умид бериши керак бўлади. Бу эса албатта, «Аталанта» каби принципиал рақибларга қарши баҳсларда кўпроқ намойиш қилиниши лозим.
Бергамоликлар учун бу ўйин турнир нуқтаи назаридан ҳам муҳим. Жамоа чемпионликдан умидини ўзган бўлса-да, агар бўшашадиган бўлса, «Ювентус» ва «Болоня»нинг таъқибига учрайди. «Аталанта» туринликлардан 2 очко кўп жамғарган ҳолда 3-ўринда бормоқда, лекин 5-ўриндаги «Болоня» ҳам жуда яқин – 4 очко фарқ бор. Яхшиям «Аталанта»нинг сўнгги икки ғалабаси айнан «Ювентус» ва «Болоня»га қарши учрашувларда рўй берди. Ушбу ўйинлар туфайли «Аталанта» қаторасига уч мағлубиятдан иборат сериядан кейин ҳам ўз ўрнини сақлаб қолишнинг уддасидан чиқмоқда.
«Аталанта» учун Милан сафари ҳам ҳатто қурқинчли бўлмаса керак. Биринчидан, ушбу стадионда ўтган охирги икки ўйинда «Аталанта» мағлубиятга учрамаган. Ўтган мавсумда 1:1 ҳисобидаги дуранг қайд этилган бўлса, Италия кубоги баҳсида ҳам меҳмонлар 2:1 ҳисобида ғалаба қозониб, «Милан»ни турнирдан чиқариб юборганди. Сўнгги йилларни оладиган бўлсак ҳам айнан Миланда ўтган охирги 14 учрашувнинг 5 тасида «Аталанта»нинг қўли баланд келган бўлса, бу даврда «Милан» атиги 4 марта зафар қучган. Иккинчидан, бу мавсумда «Аталанта» сафар ўйинларида қўлга киритилган очколар бўйича лигада энг яхши, ҳатто «Интер»дан ҳам кўпроқ очко тўплашга эришган. «Аталанта» ўз майдонида 28 очко тўплаган бўлса, сафар ўйинларидаги очколар сони 33 тага тенг. «Милан» эса уй ўйинларини у қадар ишончли ўтказмаяпти – 16 ўйиндан ҳатто ярми ҳам ғалаба билан якунланмаган.
Таркибларга тўхталадиган бўлсак, мезбонлар сафида Кайл Уокер ва Рубен Лофтус-Чик келаси ой бошларида сафга қайтиши мумкин. Эмерсон эса уч ойлик танаффусдан сўнг машғулотларга қайтган бўлса-да, ҳали майдонга тушиш учун тайёр эмас. Меҳмонларда йўқотишлар кўпроқ – Пош, Скалвини, Палестра, Колашинац, де Каталаре, ҳамда Скамаккалар ушбу муҳим ўйинда шерикларига ёрдам бера олишмайди.
РЕАЛ – АТЛЕТИК (20 апрел, 23:55)
Ўз тарихида ҳали бирор марта қуйи лигага тушиб кетмаган учинчи жамоа – «Атлетик». Шунинг учун ҳам билбаоликларнинг «Реал» ва «Барселона»га қарши ўйинлари ҳам «Класико» деб аталади. Кутилаётган ўйин эса принципиалликдан ташқари, турнир эътибори билан ҳам жуда муҳим.
Чемпионлар Лигасида муваффақиятсизликдан сўнг «Реал»да сўнгги имконият қолмоқда. Тўғри, олдинда кубок финали ҳам бор, аммо чемпионатда ҳам «Барселона»ни таъқиб қилиш учун «Реал»нинг очко йўқотишга ҳаққи йўқ. Айни дамда ўртадаги фарқ 4 очкони ташкил қилмоқда. Май ойида бўладиган «Эл Класико»гача ҳам интрига сақланиб қолиниши учун ҳам бу фарқни бой бериб қўймаслик шарт бўлади.
«Атлетик»да эса кайфият бошқачароқ. Жамоа «Рейнжерс» устидан қозонилган ғалаба туфайли Европа Лигаси яримфиналига чиқди. Шунингдек, «Атлетик» келаси мавсумда ўн йиллик танаффусдан сўнг яна Чемпионлар Лигасида қатнашишга жуда яқин турибди. Бу ҳафта Валверде шогирдлари янада яқинлашишди, чунки Ла Лигага бешта йўлланма ажратилиши маълум бўлди. «Атлетик» эса 6-ўриндаги «Бетис»дан 9 очкога кўп жамғарган. Демак Валверде шогирдларида икки йўл орқали, Европа Лигасида ғолиб чиқиш ва Ла Лигада кучли бешликдан ўрин олиш орқали Чемпионлар Лигасига чиқиш имкони сақланиб турибди. Ҳар икки томондан ҳам имкониятлар жуда яхши.
Умуман ушбу мавсумдаги «Атлетик» алоҳида тахсинларга сазовор. Жамоа охирги 22 ўйинда атиги бир марта, у ҳам бўлса Мадрида «Атлетико»га мағлубиятга учради холос. Ҳимоя чизиғи кўрсаткичлари бўйича ҳам билбаоликлар энг яхши ҳисобланишади – «Атлетик» атиги 25 гол ўтказиб юборган. Биринчи даврада эса «Реал» устидан ҳам ғалаба қозонишгани кўпчиликнинг эсида бўлса керак. Беллинҳэмнинг голига Беренгер ва Гурусета жавоб бериб, якуний ҳисоб 2:1 бўлганди. Мадриддаги ўйинларда эса одатда «Реал» муаммоларга учрамаган. Шунда ҳам, икки йил олдинги учрашув 1:1 ҳисобида якунланганини ҳам қайд этиш керак. Табиийки, бундай ҳисоб такрорланса, «Реал» чемпионликдан ҳам умидини узишга тўғри келади.
Таркиб борасида ҳам мадридликларда муаммолар каттароқ. Менди, Карвахал, Милитао каби ҳимоячиларнинг йўқлигига ўрганиб қолдик, аммо Килиан Мбаппенинг Алавесдаги қизил карточкаси ортиқча бўлди. Франциялик футболчининг дисквалификация муддати кўп муҳокама қилинди, унинг келаси ҳафта бўлиб ўтадиган кубок финалида майдонга тушиш ё тушмаслиги хавотир остида қолди, аммо маълум бўлишича, Мбаппенинг «Арсенал»га қарши ўйиндаги жароҳати ҳам жиддий. У келаси ой бошларигача майдонга туша олмаслиги эҳтимоли катта.
БОШҚА ЎЙИНЛАР
19 апрел. Хайденхайм – БАВАРИЯ (18:30), БАРСЕЛОНА – Селта (19:15), ПСЖ – Гавр (20:00), РОМА – Верона (23:45), Лас Палмас – АТЛЕТИКО (23:55)
20 апрел. Фулҳэм – ЧЕЛСИ (18:00), Ипсвич – АРСЕНАЛ (18:00), МАНЧЕСТЕР ЮНАЙТЕД – Вулверҳэмптон (18:00), Лестер – ЛИВЕРПУЛ (20:30), БОЛОНЯ – ИНТЕР (21:00), Санкт Паули – БАЙЕР (22:30).