«Нюкасл» бош мураббийи Эдди Хау клубнинг яна икки ўйинида иштирок этмайди.

«Қарғалар» бош мураббийи соғлиғи туфайли АПЛ 32-туридаги «Манчестер Юнайтед»га қарши ўйинда (4:1) ҳам қатнашмаганди. Клубнинг маълум қилишича, 47 ёшли мутахассисга ўпка яллиғланиши (пневмония) ташхиси қўйилган.

Шу ҳафтадаги «Кристал Пэлас» ва «Астон Вилла»га қарши ўйинларда жамоага Жейсон Тиндолл ва Грэм Жонс мураббийлик қилади.

«Нюкасл Юнайтед»га алоқадор барча инсонларга ва бутун футбол жамоатчилигига менга билдирган хабарлари ва илиқ тилаклари учун катта раҳмат айтаман. Бу мен ва оилам учун жуда катта аҳамиятга эга.

Шунингдек, менга ёрдам берган аъло даражадаги Миллий соғлиқни сақлаш хизмати (NHS) ва касалхона ходимларини алоҳида таъкидлаб ўтмоқчиман. Олаётган профессионал ёрдамим учун чексиз миннатдорман ва тез орада соғайиб, жамоамга қайта қўшилишни интиқлик билан кутяпман», — деди Хау.

Маълумот ўрнида, «Нюкасл» 13 апрел куни «Кристал Пэлас», 16 апрел куни эса «Астон Вилла»га қарши ўйнайди.