Чоршанба куни бўлиб ўтган Мерсисайд дербиси олдидан «Энфилд» яқинидаги ташландиқ уйларнинг металл панжараларига иккита плакат ёпиштирилди, уларда огоҳлантиришлар акс этганди.
Биринчисида «Садоқат ёки хўрозқанд» (хўрозқанд «пул» маъносида) деган шиор, иккинчисида эса «Дўст ёки хоин» деб ёзилган. Иккаласи ҳам бир хил сўзлар билан тугаган: «Танла, Трент».
Ҳа, «Ливерпул» мухлислари шартномаси тугаётган Трент Александер-Арнолднинг кетишини ва унинг «Реал Мадрид»га ўтишини ҳазм қила олишмаяпти.
Қизиқ саволлар пайдо бўлган? 26 ёшли футболчи билан «Энфилд» қандай хайрлашади? Эҳтимол, бу ёқимсиз бўлади. Агар у ҳозиргидан 5 ёш катта бўлганида ёки асосий таркиб футболчиларидан бири ҳисобланмаганида, ҳаяжонли хайрлашувни кўрармидик?
Ҳафта ижтимоий тармоқларда Александер-Арнолд ва Роберто Фирминони таққослашлар билан бошланди. 2023 йилда бразилиялик футболчининг эмоционал тарзда клубни тарк этгани келтирилиб, бу тўғри кетиш усули сифатида кўрсатилди.
«Ливерпул» мухлисларининг Трент шартномани узайтирмагани ва «Реал» билан оғзаки келишувга эришганидан ҳафсаласи пир бўлган. Топ даражадаги футболчининг кетишидан ғазабланишни тушунса бўлади, аммо Фирминонинг кетиши билан таққослашга қўшилиб бўлмайди.
Бразилиялик ҳужумчи кетаётганида аллақачон аввалги даражасида эмасди ва захира футболчисига айланиб қолганди. У клубда қолишни хоҳлагани ҳеч кимга сир эмас ва агентидан «Ливерпул» якуний қарорни айтмагунича, бошқа клублар билан гаплашмасликни сўраган. Бироқ Фирминонинг эшигини «Реал»дек ҳар йили соврин ютиши кафолатланган клуб тақиллатмаган, унинг энг яхши йиллари ҳам ўтиб бўлганди. Агар Бобби формада ва айни кучга тўлган ёшда бўлганида, унинг ҳам позицияси бошқача бўлиши мумкин эди.
«Ливерпул» мавсумни 25 май куни «Кристал Пэлас»га қарши «Энфилд»даги баҳс билан якунлайди. Хўш, Трент қандай кузатилади?
Ўйлаб кўрсак, 26 ёшли ҳимоячининг хафагарчиликсиз кетишининг «тўғри» йўли йўқ. Қандай бўлмасин, унинг кетиши кўплаб мухлислар қалбида из қолдиради.
2018 йилда «Ливерпул» Филиппе Коутиниони «Барселона»га 125 миллион фунтга сотган ва бу маблағ эвазига Чемпионлар Лигаси ҳамда Премер-лигани ютган таркибни тузганди. Агар Александер-Арнолд ҳам маълум бир пулга трансфер қилинганида, бу мерсисайдликларга ёрдам берармиди? Ҳа, клуб ўз тарбияланувчисини сотиш орқали пул ишлаб олса, молиявий зарарларни бироз камайтириши мумкин эди. Лекин «Ливерпул» қишда «Реал»дан таклиф бўлганида, ҳали 4 та фронтда кураш олиб бораётганди ва требл ёки квадруплга эришиб, Трент билан шартномани узайтиришга умид қилаётганди. Март ойи якунига келиб эса клубда фақат Премер-лига қолди, ички кубоклар ва ЕЧЛ бой берилди.
Аммо бошқа клубларнинг тарихи шуни кўрсатадики, мухлислар катта рақамларга кам эътибор беришади. «Астон Вилла» мухлислари «Манчестер Сити»га 100 млн фунтга сотилган Жек Грилиш «Вилла Парк»ка рақиб сифатида қайтганида уни ҳақорат қилишдан ёки «Вест Ҳэм» мухлислари Деклан Райс «Арсенал»га ўтганидан сўнг футболчига нисбатан ҳуштакбозлик қилишдан тийилишмади.
Бу икки трансфернинг фарқи шундаки, сотаётган клуб кучга эга эди ва футболчилар орқали яхшигина пул ишлаб олди. «Ливерпул» бундай позицияни сақлаб қолишга муваффақ бўлолмади ва ҳозир қийин аҳволда. Ҳимоячи учун янги шартнома таклиф қилинган, аммо Трентда клубнинг ёрқин келажаги борасида ишонч йўқ. Футболчида пул эмас, кўп совринлар ютиш мотивацияси бор. 6 ёшида «Ливерпул»га келган бола учун янги чақириқ ва турмуш тарзи ҳар қандай меросдан муҳимроқ бўлиб чиқди.
Бундай ўйинчиларнинг клубдан кетиши ҳеч қачон силлиқ кечмайди. «Ливерпул» тарихидаги энг яхши яримҳимоячилардан бири Грэм Сунесс 1984 йилда «Рома»га қарши Чемпионлар Кубоги финалида аъло даражада ўйнаганидан сўнг «Сампдория»га ўтган. Ўшанда ҳаммаси осон тушунилиши кутилган, бироқ футболчи танқидлар остида қолганди. Эҳтимол, «Ливерпул» каби ўта эмоционал клубдан кетишнинг тўғри йўли мавжуд эмас.
Фирмино 2015 йилда «Ҳоффенҳайм»дан 29 миллион фунтга келганди. У ва Трент «Ливерпул»да ютиш мумкин бўлган барча совринларни қўлга киритишди. Аммо бразилиялик форвард билан клуб тарбияланувчисининг кетиши фарқли бўлади. Буни «Ливерпул» мухлислари тушунишлари, уларни таққосламасликлари керак.
The Athletic сайтидан Аъзамжон Иззатиллаев таржимаси