Клублар футболи апрел ойига, яъни энг қизғин палласига кириб бормоқда. Испания ва Италияда чемпионлик пойгасига таъсир қилиши мумкин бўлган қизиқарли учрашувлар кутиб турган бўлса, Францияда «ПСЖ» бугуноқ расман бу масалани ҳал қилиши мумкин. Парижликлар «Анже»га қарши ўйинда 1 очко олишса ёки «Монако» ўз ўйинида очко йўқотадиган бўлса, Энрике шогирдлари кучли бешликда биринчи бўлиб чемпионга айланишади ва ЕЧЛ ҳал қилувчи ўйинлари олдидан енгиллаб олишлари мумкин.

РЕАЛ – ВАЛЕНСИЯ (5 апрел, 19:15)

Бу афиша бир пайтлар Испанияда чемпионлик курашини англатарди, ҳатто Чемпионлар Лигаси финалида ҳам рақиб бўлишган. Аммо сўнгги йилларда «Валенсия»да инқироз давом этмоқда, жамоа йилдан йилга пасайиб, ҳатто лигада қолиш учун курашувчи тоифага қўшилиб қолди. Жамоа сўнгги 4 ўйинда икки ғалаба ва икки дурангга эришиб, 16-ўринга кўтарилиб олди ва шунда ҳам хавфли зона билан атиги 4 очко ажратиб турибди холос. Умуман «Валенсия»нинг қутқарилиш миссияси декабрда бош мураббийликка Карлос Корбераннинг келиши билан боғлиқ. Фаолиятини «Реал»га мағлубиятдан бошлаган Корребан кейинги 11 ўйинда 5 ғалаба ва 4 дуранг қайд этди. Жамоа аввалги 18 ўйинда шунча очко тўпланган эди. Корребан келганидан сўнг жамоа фақат «Реал», «Барселона» ва «Атлетико»га ютқазди холос.

«Реал»нинг ҳолати бироз бошқача. Жамоа ўзи иштирок этаётган барча мусобақаларда ғолиблик учун даъвогарлик қилмоқда, сўнгги ўйинларда ўзи учун керакли ҳисобларни қайд этмоқда ҳам. Аммо бу ғалабалар жуда қийинчилик билан қўлга киритилаётганини ҳам эътироф этиш керак. Етарлича ва тизимли қаршилик бўлганда «Реал» рақиб ким бўлишидан қатъи назар муаммоларга дуч келмоқда. Буни айниқса, сўнгги плей-офф ўйинларида ҳам кўриш мумкин. «Атлетико» билан ўйинда фақат пеналтилар серияси «Реал»ни кейинги босқичга олиб чиққан бўлса, «Сосьедад» «Бернабеу»да ғалаба қозониб кетишига сал қолди. Фақат қўшимча бўлимлардаги гол эвазига керакли дурангга эришилди холос. Чемпионат баҳсларида ҳам охирги уч ўйинда ўртамиёна рақибларга қарши кечган бўлса-да, фақат минимал ҳисобда ғалабалар қайд этилди.

Плей-офф ўйинларини бекор эсламадик. «Валенсия» лигада жон сақлаш учун курашда эканини эътиборга олсак, улар ҳам ҳар ўйинни сўнгги имкониятдек ўтказиши табиий. Айниқса, «Реал»га қарши сўнгги икки ўйинни эслайлик. «Местальяда кечган биринчи давра ўйини охирги дақиқаларигача «Валенсия» ҳисобда олдинда борди ва ҳатто бир киши кўп бўлиб ўйнаётганди. Аммо Беллинҳэмнинг қўшиб берилган вақтдаги голи меҳмонларга иродали ғалаба олиб келган. Ўтган мавсумдаги ўйин эса 2:2 ҳисобида якунланган. Сўнгги дақиқаларда «Реал»нинг голи эрта хуштак чалингани сабаб бекор қилингани ва бу узоқ вақт жанжалларга сабаб бўлгани ёдингизда бўлса керак.

Жароҳатлар ҳар икки томонда ҳам етарли. «Реал»да Карвахал, Милитао, Менди ва Себальоснинг йўқлигига ўрганиб қолдик, бу сафар Тибо Куртуа ҳам шерикларига ёрдам бера олмаслиги мумкин. «Валенсия»да эса биратўла уч футболчи ўтган турда бешинчи сариқ карточкани олишди. Гайя, Фулкие ва Риоха дисквалификация туфайли ўйинни ўтказиб юборишади. Шунингдек, Коррейя ва Хаймеда жароҳат бор.

БАРСЕЛОНА – БЕТИС (5 апрел, 23:55)

Тармоқларда Ла Лигада сўнгги 9 ўйиндаги натижалар бўйича алоҳида турнир жадвалига кўзингиз тушган бўлса керак. «Барселона» юз фоизлик кўрсаткич билан биринчи ўринда бўлса, кейинги ўринда «Реал» ёки «Атлетико» эмас айнан «Бетис» жойлашганди. Пеллегрини шогирдлари охирги 9 турда 7 бор ғалабага эришиб, айни пайтда Чемпионлар Лигаси йўлланмаси учун даъвогарга айланишди.

Нега айнан 9 тур олинганининг ҳам сабаби бор. Бу бразилиялик вингер Антонининг «МЮ»дан ижарага олиниши билан бошланган. Катта нарх ва муваффақиятсиз ўйинлари туфайли ҳамманинг эътиборига тушган Антони Испанияга келиб худди «Аякс» даврига қайтиб қолгандек. Гўёки агар у ўша пайтда «МЮ»га ўтмаганида, ҳозир унга ўша пулни тўлаб сотиб олишлари ҳам мумкиндек. Антони «Бетис»даги қисқа даврида 4 гол ва 4 ассист қилишга улгурди – Манчестердаги сўнгги бир ярим мавсумига нисбатан ҳам анча кўп. Лекин яна бир факторни қайд этиш керакки, бу Антонининг трансферидан ҳам муҳимроқ – Иско. «Бетис»нинг кўтарилиш даври Антонининг трансферидан ташқари, Исконинг жароҳатдан фориғ бўлиб, сафга қайтиши билан ҳам боғлиқдир. Декабр ойи охирларида майдонга туша бошлаган Иско ўтган уч ой давомида аллақачон гол ва пас  бўйича 9+6 қилишга улгурди. Ҳозирда «Бетис»нинг ҳужумдаги сермаҳсуллигига айнан мана шу икки футболчи жавоб бермоқда.

Афсуски, «Барселона»га қарши ўйинда Иско майдонга туша олмайди. У ўтган турда бешинчи сариқ карточкасини олди ва дисквалификация туфайли бу учрашувни ўтказиб юборади. Искодан ташқари меҳмонлар сафида ўз вақтида «Барселона» аъзоси бўлган Абдусамад Эзаззули ҳам жароҳат туфайли ўйнай олмайди. Шунингдек, Марко Роканинг ҳолати сўроқ остида турибди. «Барселона» сафида Дани Олмода жароҳат бор ва у шу ойнинг охирига сафга қайтиб қолса керак.

Жамоалар ўртасида биринчи даврада кечган ўйин мезбонларнинг устунлигида ўтган ва 2:2 ҳисоби қайд этилганди. Аммо айнан «Барселона» мезбон ўйинларда вазият бошқача – ўтган мавсумда «Барселона» 5:0 ҳисобида ғалаба қозонган бўлса, икки ой олдин Испания кубоги баҳсида ҳам Флик шогирдлари шунча гол уришга муваффақ бўлишган – 5:1.

Барча турнирларда қатнашаётган «Барселона» учун энг қийин палла бошланаётгани сир эмас. Куни кеча жамоа Мадридда Испания кубоги яримфиналида майдонга тушди, келаси ҳафта эса Чемпионлар Лигасида «Боруссия»га қарши чорак финал кутиб турибди. Бу орада чемпионатда ҳам очко йўқотиш мумкин эмас, зеро «Реал» изма из таъқиб қилиб келмоқда. Таркибнинг нисбатан анча ёш футболчилардан иборат эканини эътиборга олсак, бу режимда узоқ вақт ҳал қилувчи ўйинларда майдонга тушиш қийин бўлиши эҳтимоли катта. Тажрибали футболчилар ва Фликка асосий масъулият тушади. Кузатамиз.

МАНЧЕСТЕР ЮНАЙТЕД – МАНЧЕСТЕР СИТИ (6 апрел, 20:30)

Албатта, жамоалар эгаллаб турган ўрни ва ҳолатидан қатъи назар Манчестер дербиси Англияда катта воқеа саналади. Айниқса, ҳар икки жамоани мавсум давомида таъқиб қилган муваффақиятсизликлар даврида айнан мана шундай ўйинларда ғалаба қозониш орқали мухлисларни «юпатиш» имконияти бўлади. Турнир нуқтаи назаридан «шаҳарликлар» учун ғалаба муҳим, зеро Чемпионлар Лигаси йўлланмаси учун курашда рақобатчилар кўп, ҳар қандай очко йўқотилишининг ўз таъсири бўлади. Мезбонлар учун АПЛ да турнир мотивацияси қолмаган бўлса-да, ўйин «Олд Траффорд»да кечиши, жамоа ўтган ўйинда «Ноттингҳем Форест»га имкониятни бой берганидан келиб чиқсак, ўзини кўрсатиш учун айни муддао. Эсингизда бўлса ўтган сафар ҳам «МЮ» «Ноттингҳем»га ўз майдонида ютқазиб қўйгач, кейинги турда «Этиҳад»даги ғалаба билан айбини ювганди.

Рубен Аморим учун эса ўзига хос элит мураббийлар рўйхатига кириш имконияти бўлади. Шу пайтгача фақат Юрген Клопп ва Оле-Гуннар Сулшер бир мавсумда Пеп Гвардиола устидан уч марта ғалаба қозонишга муваффақ бўлишган. Агар бу ўйинда мезбонлар ғалаба қозонса, Аморим айнан мана шундай натижага эришган бўлади. Биргина фарқ, португалиялик мутахассис бу ишни икки жамоа билан амалга оширган бўлади. Эсингизда бўлса, кузда «Спортинг» бош мураббийи сифатида Аморим Пеп устидан 4:1 ҳисобида ғалаба қозонган.

Яна бир статистик факт, айни пайтда «МЮ»нинг «Манчестер Сити»га қарши мағлубиятсиз серияси 3 ўйинга етган. Ўтган мавсум охиридаги кубок финали, ушбу мавсум бошида пеналтилар сериясигача борган Суперкубок учун учрашув, ҳамда биринчи давра ўйинида «қизиллар» «Манчестер Сити»га ютқазишмади. Бундай узун серия охирги марта 2011 йилда, Фергюсон даврида содир бўлган экан.

Таркибларга келадиган бўлсак, ҳар икки жамоада ҳам жароҳатлар етарли ва мавсум давомида бу билан курашиб келишмоқда. Стоунз, Аканжи, Аке каби ҳимоячиларга қўшилиб, энди Эрлинг Ҳоланд ҳам жароҳат олди. Унинг майдонга қайтиши мавсум охирларига тўғри келиши мумкин. Омар Мармуш «Лестер» билан ўйинда норвегиялик шеригининг йўқлигини билдирмаган бўлиши мумкин, аммо кучлироқ жамоаларга қарши ўйинларда Ҳоланднинг ўрни билиниши шубҳасиз. Биринчидан, аслида Мармушнинг голларида ҳам айнан Ҳоланднинг ҳаракатлари, унга зоналар очиши билан боғлиқлиғи бор, иккинчидан, одатда Эрлинг Манчестер дербиларида анча сермаҳсул ҳаракат қилади. Аморим узоқ муддатга сафдан чиққан Шоу, Мартинес, Амад каби футболчилардан ташқари, Эванс ва Хевендан ҳам ҳозирча фойдалана олмайди. Майну жароҳатдан фориғ бўлгани айтилмоқда, аммо майдонга тушишга ҳали тайёр бўлмаслиги мумкин. Шунингдек, матбуот анжуманида Матиас де Лигтнинг ҳолати шубҳа остида эканини мураббий тасдиқлади. Катта эҳтимол билан Ҳарри Магуайр ва Мейсон Маунтлар бу сафар асосий таркибга қайтишлари мумкин.

Ҳусановга келсак, унинг дербида майдонга тушиш эҳтимоли юқори. У «Лестер»га қарши ўйинда қайдномага киритилмади ва етарлича дам олди. Марказий ҳимоячилар борасида шундоқ ҳам етишмовчилик борлигини эътиборга олсак, Пеп яна Диаш – Ҳусанов жуфтлигига мурожаат қилса керак. Яна бир қизиқ факт, Ҳусанов «Ланс» аъзосига айлангач, жамоа мавсумолди учрашувларидан бирини «Олд Траффорд»да ўтказган, Ҳусанов эса сўнгги дақиқаларда майдонга тушганди. Бу футболчимизнинг Англия майдонларидаги илк қадами бўлган. Мана орадан қарийб бир ярим йил ўтиб у энди ўртоқлик ўйинида эмас Манчестер дербисида асосий таркибда ҳаракат қилади.

РОМА – ЮВЕНТУС (6 апрел, 23:45)

Италияда икки футбол пойтахти тўқнаш келади. Афсуски, ўртага чемпионлик ё бирор соврин эмас, Чемпионлар Лигаси йўлланмаси учун кураш, яъни кучли тўртликка кириш имконияти турибди холос. «Ювентус» 55 очко билан 5-ўринда бормоқда ва 4-ўриндаги «Болоня»дан 1 очкога ортда бормоқда. «Болоня» бу турда «Наполи»га қарши ўйнашини эътиборга олсак, очко йўқотиш эҳтимоли баланд, яъни туринликлар шу турдаги ғалаба билан яна кучли тўртликка қайтишлари мумкин.  Бундан ташқари, «Ювентус»нинг янги мураббийи Игор Тудор учун ҳам ўзини кўрсатиш имконияти. Жамоа хорватиялик мураббийнинг дебют ўйинида ғалаба қозонган бўлса-да, ўз майдонида, кичик ҳисобда ва «Женоа» каби аутсайдер жамоага қарши содир бўлганди. «Рома»га қарши Римда яхши ўйин кўрсатиш мураббий учун ўзига яраша ўлчов сифатида кўрилади.

«Рома» эса олтинчи ўринда бормоқда ва «Ювентус»дан 3 очко кам жамғарган. Римликлар учун ҳам ушбу пойгага қўшилиш учун айни муддао. «Рома» чемпионатда ўзини ўнглаб, юқори ўринлар учун даъвогарга айланишига сўнгги турлардаги муваффақиятли серия сабаб бўлди. Айни пайтда Раньери шогирдларининг кетма-кет ғалабалари сони 7 ўйинга етди. Бу ўйинларда айниқса, ҳимоя чизиғини эътироф этиш лозим. Мана шу етти ўйинда жамоа атиги битта гол ўтказиб юборди холос. Агар ҳимоя ҳақида гап борса, «Ювентус»ни ҳам эътироф этиш керак – туринликлар лигада энг кам гол ўтказиб юбормаган бўлишса-да, қуруқ ўйинлар сони бўйича етакчи. 15 ўйинда рақиблар «Ювентус» дарвозасини ишғол қила олмаган.

«Рома» сафида жароҳатланган Дибала ва Реншдан ташқари, Алексис Саламакерс дисквалификация туфайли ўйнай олмайди. У «Лечче»га қарши ўйинда бешинчи сариқ карточкасини  олганди. «Ювентус» таркибида Федерико Гатти яна жароҳат олди ва энг яхши эҳтимолда бир ойлардан кейин сафга қайтиши мумкин.

БОШҚА ЎЙИНЛАР

5 апрел. Эвертон – АРСЕНАЛ (16:30), Ҳайденхайм – БАЙЕР (18:30), Фрайбург – БОРУССИЯ Д (18:30), ПСЖ – Анже (20:00), Парма – ИНТЕР (21:00), АСТОН ВИЛЛА – Ноттингем Форест (21:30), МИЛАН – Фиорентина (23:45)

6 апрел. Брентфорд – ЧЕЛСИ (18:00), Фулҳэм – ЛИВЕРПУЛ (18:00), ТОТТЕНҲЭМ – Саутҳэмптон (18:00), Севилья – АТЛЕТИКО (19:15), АТАЛАНТА – Лацио (21:00), Вилляреал – АТЛЕТИК (23:55).