«Барселона» президенти Жоан Лапорта Дани Олмо ва Пау Викторнинг рўйхатдан ўтказилиши бўйича юзага келган вазият ҳақида фикр билдирди.

Аввалроқ, Испаниянинг Олий спорт кенгаши (CSD) «Барса»ни қўллаб-қувватлаб, Ла Лигага қарши қарор чиқаргани эди. Унга кўра, Олмо ва Виктор мавсум охирига қадар жамоа рўйхатидан чиқарилмайди.

«Албатта, «Атлетико»га қарши ўйиндан аввал (маош лимити камайтирилиши ҳақидаги) хабар пайдо бўлганида хавотирда эдик. Биз тизимнинг қандай ишлашини биламиз, шунинг учун жамоамизни дестабилизация қилишга уринишлар ҳайратланарли эмас», — деб Лапорта сўзларини келтирди Mundo Deportivo.

«Хайрият футболчиларимиз кучли бўлишди ва вазиятни тўғри тушунишди. Биз Дани Олмо ва Пау Викторни қонуний тарзда рўйхатдан ўтказдик. Ла Лига ҳамда федерация талабларини тўлиқ бажардик», – деди Лапорта.