03.04.2025 15:32
8258
Теглар
ФИФА рейтинги. Ўзбекистон миллий жамоаси сўнгги 9 йилликдаги энг яхши натижасини қайд этди

ФИФА расмий сайти 2025 йил март ойи якунларига кўра миллий жамоалар рейтингини янгилади.

Унга кўра, Ўзбекистон миллий жамоаси март ойида ЖЧ-2026 саралаш босқичида Қирғизистон устидан ғалаба (1:0) ва Эрон билан сафарда дуранг (2:2) қайд этган ҳолда рейтингда бир поғона кўтарилиб, 57-ўринни эгаллади.

«Оқ бўрилар» ноябр ойида Қатар (2:3) ва КХДР (1:0) билан учрашувлардаги бир мағлубият ва ғалаба билан йилни рейтингда 58-ўринда якунлаган эди.

Қайд этиш жоиз, 57-ўрин миллий жамоамиз учун сўнгги 9 йилликдаги энг яхши натижа саналади. Бунгача миллий жамоа Самвел Бабаян мураббийлигида 2016 йилда ФИФА рейтингида 48-ўринни қайд этганди.

ФИФА рейтингида Аргентина миллий жамоаси 1-ўринда бормоқда, Испания Францияни (3-ўрин) ортда қолдириб, 2-ўринга кўтарилди. Англия 4-ўрин, Бразилия 5, Нидерландия 6, Португалия 7-поғонада. Белгия (8),  Италия (9) ва Германия ўнликдан жой олган.

Осиё жамоалари топ-10лик орасида эса вакилларимиз 6-ўринга кўтарилди. Япония қитъада пешқадам саналади – 15-ўрин, Эрон (18) ва Жанубий Корея (23) учликда. Австралия 26-ўринда, Қатар Осиё жамоалари орасида энг катта пасайиш – 7 поғона «шўнғиган» бўлса-да, 55-ўрин билан Осиёнинг 5-жамоаси бўлиб турибди. Ўзбекистон эса рейтингда Ироқни (59) ортда қолдириб, 57-ўрин билан қитъанинг 6-жамоасига айланди. Саудия Арабистони (58), Ироқ (59), Иордания (62) ва БАА (65) ўнликка кирган.

Эслатиб ўтамиз, Сречко Катанец қўл остида вакилларимиз 2023 йилни 68-ўринда якунлаган бўлса, Қатарда ўтган Осиё кубогидан кейин 66-ўринга кўтарилганди. Март ойидаги ФИФА кунлари доирасида Ҳонгконгга қарши ЖЧ-2026 2-саралаш босқичидаги ғалабалардан кейин (2:0, 3:0) Ўзбекистон миллий жамоаси ЖЧ-2026 ҳал қилувчи саралаш босқичи ва Осиё кубоги-2027га йўлланмасига эга чиқиб, рейтингда 64-ўринга юқорилаганди. ЖЧ-2026 2-саралаши доирасидаги Туркманистон (3:1) ва Эрон (0:0) билан ўйинлардан кейин вакилларимиз яна икки поғона юқорилаб, 62-ўриндан жой олган, июл ойида эълон қилинган рейтингда эса 61-ўрин, сентябрда яна бир поғона юқорилаганди. Йилни эса 58-поғонада якунлаганди.

Маълумот учун, Ўзбекистон миллий жамоасининг ФИФА рейтингидаги энг яхши натижаси – 45-ўрин бўлиб, вакилларимиз 2006-2007 йилларда ушбу ўринда қайд этилганди.

Турнир жадваллари
Team
W D L Pts
Сўнгги янгиликлар
Долзарб хабарлар