«Арсенал»нинг «Фулҳэм» (2:1) дарвозасига урган голи АПЛ тарихидан ўрин олди. 

30-турда «тўпчилар» яримҳимоячиси Микел Меринонинг голи кетма-кет 50 та узатмадан сўнг юзага келди. Ҳужум ўйиннинг 33:35 дақиқасида бошланиб, 36:55да гол билан якунланди.  

«Арсенал» 2006/07 йилги мавсумдан — яъни статистика юритила бошланган даврдан бери Премер-лигада голгача бўлган энг узоқ ҳужумни намойиш этди ва рекорд ўрнатди.

Лига расмий веб-сайтидаги маълумотларга кўра, бунгача энг яхши натижа «Тоттенҳэм»га тегишли бўлган — 2014 йил август ойида «шпорлар»собиқ  ҳавбеки Носир Шадли КПР дарвозасига қаторасига 48 та узатмадан сўнг тўп киритган.