«Реал» клуби бош мураббийи Карло Анчелотти судда сўзга чиқди. Италиялик мутахассис Испанияда солиқлардан бўйин товлаш иши бўйича айбланувчи сифатида иштирок этди.

Анчелоттининг айтишича, «Реал» унга маошининг бир қисмини унинг имидж ҳуқуқи тўловлари сифатида олишни таклиф қилган.

«Мен фақат уч йил давомида 6 миллион евро «соф» даромад олишим ҳақида ўйладим. Ҳеч қачон бирор нарса нотўғри эканини гумон қилмаганман ва прокуратура менга қарши тергов ўтказаётгани ҳақида ҳеч қандай хабар олмаганман.

«Реал» менга бу (имидж ҳуқуқи тўловларини топшириш) ҳақида таклиф берганда, мен ўзимнинг англиялик маслаҳатчим билан боғландим ва шундан кейин батафсил ўрганишга киришмадим, чунки бу тўғри нарса бўлиб кўринган эди. Мен бу иш қандайдир фирибгарлик бўлиши мумкин деб ўйламаганман», – деб Анчелоттининг сўзларини келтиради El Mundo Deportivo.