Американинг МЛС лигаси Лионел Мессига ҳамроҳлик қилувчи тансоқчиси Яссин Чеукога ўйинлар давомида майдонга чиқишни тақиқлади, деб хабар беради Bolavip.

Манбага кўра, бу қарор ҳар бир стадионда етарлича хавфсизлик хизмати мавжудлиги ва қўшимча ҳимоя зарур эмаслиги билан изоҳланган. Чеуко майдонга тушиб, Месси билан суратга тушишга уринган мухлисларга қаршилик қилгани билан танилган.

«Менга энди майдонга чиқишга рухсат берилмайди. Мен Европада етти йил ишладим – Лига 1 ва Чемпионлар Лигасида. Бу вақт давомида атиги олти нафар мухлис  майдонга тушган эди. АҚШга келганимдан бери эса 20 ой ичида 16 марта шундай ҳолат бўлди.

Бу ерда катта муаммо бор. Мен муаммо эмасман – Леога ёрдам беришга рухсат беринг. Мен МЛСни яхши кўраман, аммо биз биргаликда ишлашимиз керак. Мен ёрдам беришни яхши кўраман. Мен ҳеч кимдан устун эмасман, аммо Европа тажрибасига эгаман. Лекин, лиганинг қарорини тўғри тушунаман», – деди Чеуко.

Эслатиб ўтамиз, Чеуко АҚШ армиясининг собиқ махсус жангчиси бўлиб, Ироқ ва Афғонистонда хизмат қилган. У жанг санъатлари бўйича мутахассис ва ММАда бир нечта жангларда иштирок этган.