Мюнхеннинг «Бавария» клуби собиқ дарвозабони Зепп Майер жамоа ҳужумчиси Томас Мюллер тез орада футболчилик фаолиятини тугатиши мумкин деб ўйламоқда. Аввалроқ, «Бавария» 35 ёшли футболчи билан шартномани узайтиришни режалаштирмаётгани ҳақида хабарлар пайдо бўлган эди.

«Мен бунақа қарорларни тушунмайман. Мюллердек ўйинчилар клубнинг юраги ва руҳи бўлишади. У кабилар кетганда, жамоа ўзининг бир қисмини йўқотади. Эҳтимол Томас фаолиятини якунлар. Унга Америка ёки Дубайда нима бор? Ахир унинг оиласи, хотини, отлари ва бахтли бўлиши учун ҳамма нарса Мюнхенда», – деди Майер Sky Sport Germany билан суҳбатда.

Эслатиб ўтамиз, Мюллер «Бавария» тарихида энг кўп ўйин ўтказган футболчи ҳисобланади. У 2023 йил сентябр ойида Майернинг рекордини (709 ўйин) янгилаган эди.

Айни вақтда Томас 830 та ўйинда майдонга тушган.