«Осасуна» ўзининг расмий сайтида Испания Қироллик Футбол Федерациясига (RFEF) «Барселона» устидан шикоят қилганини эълон қилди. 

Жамоа расмийларининг фикрича, каталонияликлар ҳимоячиси Иниго Мартинес кеча регламентга зид равишда учрашувда иштирок этган (3:0).

«Осасуна»нинг баёнотида Мартинеснинг ўйинда қатнашиши ФИФА регламентига зид, деб таъкидланди. Боиси, тиббий сабаблар билан миллий жамоадан кетган футболчи халқаро танаффус тугаганидан кейин беш кун ичида ўз клуби учун ўйнаш ҳуқуқига эга эмас.

Шунингдек, 17 март куни Испания Қироллик Футбол Федерацияси томонидан Мартинеснинг Испания миллий жамоасидан тиббий сабаблар билан четлатилгани таъкидланди.

Эслатиб ўтамиз, Испания 23 март куни Нидерландияга қарши Миллатлар Лигаси чорак финали жавоб ўйинини ўтказди (3:3, 5:4 пен.). «Барселона»нинг «Осасуна» билан баҳси эса 27 март куни бўлиб ўтди.