Роналд Араухо «Осасуна» билан ўйин учун «Барселона» қайдномасига киритилди. 

Аввалроқ «кўк-анорранглилар» бош мураббийи Ҳанс-Дитер Флик 26 ёшли ҳимоячи бўлажак ўйинда иштирок этмаслигини, чунки у миллий жамоалар ўйинларидан кейин дам олиши кераклигини айтганди. 

Бироқ уругвайлик футболчининг ўзи мураббийдан қайдномага киритишни сўради. Роналднинг фикрича, у етарлича дам олди ва жамоага ёрдам беришга тайёр. 

Германиялик мутахассис шогирдининг илтимосини қабул қилди. Флик Араухонинг Боливияга қарши ўйинда қатнашмаганлигини инобатга олди.

Ҳимоячи 27 март кунги беллашувни захирада бошлайди. Вазиятга қараб, иккинчи бўлимда майдонга тушиши мумкин.