«Ювентус» ўтган ҳафта Тиаго Моттани истеъфога чиқариб, унинг ўрнига Игор Тудорни бош мураббий этиб тайинлаганди. 

Football Italia нашрининг хабар беришича, янги мураббий мавсум охиригача 500 минг евро миқдорида маблағ ишлаб олади. 46 ёшли мутахассис якшанба куни Туринга етиб келиш учун ўз машинасида Сплит шаҳридан 1000 км дан ортиқ масофани босиб ўтган. Бунинг учун мураббий 10 соат вақт сарфлагани айтилмоқда.

Маълум қилинишича, Тудор ўз лавозимига бугунданоқ киришган ва у миллий жамоалар йиғинига жалб қилинмаган футболчилар билан машғулотлар ўтказмоқда. Мураббийнинг «кекса синьора» билан шартномасида шундан банд борки, агар клубнинг ишлари ижобий томонга ўзгарса, битим 2026 йилгача узайтирилади. Акс ҳолда Игор ёзда жамоани тарк этади. 

Эслатиб ўтамиз, Тудор 1998 йилдан 2007 йилгача «Ювентус»да ўйнаган ва 2020-2021 йиллар мобайнида  туринликлар мураббийлар штабида ишлашга ҳам муваффақ бўлган. Хорватиялик мутахассис бош мураббий сифатида «Марсел», «Лацио», «Верона», «Удинезе» каби клубларда фаолият олиб борган.