ЖЧ-2026 саралаш босқич 8-тури доирасидаги Эрон – Ўзбекистон миллий жамоалари ўртасидаги учрашув олди матбуот анжуманида форслар бош мураббийи Амир Ғаленойи ва футболчи Али Ризо Жаҳонбахш иштирок этди.

«Бисмиллаҳир Роҳманир Роҳийм. Энг аввало Ўзбекистон миллий жамоасига Теҳронга хуш келибсиз, демоқчиман. Фурсатдан фойдаланиб, Ўзбекистон миллий жамоаси тиббий штабига миннатдорчилигимни билдирмоқчиман. Чунки Тошкентдаги сўнгги сафаримиз чоғида улар бизга анча ёрдам беришди.

Ўзбекистон ҳақида гапирадиган бўлсам, сўнгги 10 йил ичида мамлакат ёшлар футболида анча кучайиш ва ўсишга эришди. Буни юқори даражадаги ўйинчилар етишиб чиқаётганидан ҳам кўрса бўлади. Хусусан, ҳозир Эрон чемпионатида ҳам юқори савиядаги ўзбекистонлик футболчилар фаолият юритмоқда.

Ўзбекистон миллий жамоаси 3-4-3 тактикасида ҳаракат қилади ва эртага бизни қарши ҳужумда жазолашга уринса керак. Биз ҳам яхши натижа кўрсатишга ҳаракат қиламиз. Ўзбекистон билан сўнгги ўйинлардаги статистика бизнинг яхши иштирокимизни кўрсатиб турибди. Эртага стадионга кўплаб мухлислар келиб, бизни қўллаб-қувватлашига ишонаман. Ғалаба орқали халқимизга Наврўз байрамига совға тайёрлашни мақсад қилганмиз.

2026 йилги жаҳон чемпионати масаласини ҳали расман ҳал қилганимиз йўқ. Ўзбекистондан ташқари яна иккита ўйин кутиб турибди. Ҳар бир баҳс ўзига хос тарих. Ўзбекистонга қарши ўйинда ҳам фақат ғалаба учун майдонга тушамиз.

Таркибимиздаги ўйинчилар жаҳон даражасидаги футболчилар саналади, улар ҳам баҳс муҳимлигини тушуниб турибди. Биз учун бўшашмаслик, хотиржамликка берилмаслик муҳим. Ҳали ЖЧ-2026га чиқмаганимизни унутмаслик шарт.

Жамоани ёшартириш жараёни бирданига юз берадиган жараён эмас, бу босқичма-босқич амалга ошади. Баъзи ўйинчиларни биз шунчаки таркибдан чиқариб юбора олмаймиз. Уларнинг ўрнини босадиган даражадаги ўйинчиларга ҳали эга эмасмиз.

Меҳди Торемийнинг ҳолати? Футболчининг соғлиғи – энг муҳим ҳисобаланди. Бугун кечқурун машғулот ўтказгач, Торемийнинг майдонга тушириш ёки туширмаслик бўйича бир тўхтамга келамиз. У олдинги ўйинда БААга қарши баҳсга тушиши мумкин эди, аммо таваккал қилмасликка қарор қилгандик.

Эрон айни дамда ФИФА рейтингида 16-ўринда ва бу тарихдаги энг яхши натижамиз. Бу ютуқлар сўнгги икки йиллик меҳнатимиз самараси деб ўйлайман. Барча футболчилар ва Федерациянинг меҳнатини айтиш лозим. Қийинчиликларга қарамай, яхши натижа кўрсатдик, Осиё кубогида Японияни мағлуб этдик. Энди ЖЧ-2026 финал босқичида ҳам камида плей-офф йўлланмасини кўзлаш лозим», - дейди эронликлар бош мураббийи Амир Ғаленойи.

«Жаҳон чемпионати Эрон халқи учун қанчалик муҳим аҳамиятга эга эканини яхши тушуниб турибмиз. Бош мураббийнинг барча фикрларига қўшиламан. Ўзбекистон миллий жамоаси сўнгги йилларда Осиёда анча кучайишга эришган миллий жамоалар сафига киради. Ўйлайманки, эртага баҳс қийин бўлади. Барчамиз баҳсга тайёрмиз», - деди Жаҳонбахш.

Маълумот учун, Эрон – Ўзбекистон учрашуви 25 март куни соат 21:00да бошланади.