Криштиану Роналду Португалиянинг Дания устидан қозонган ғалабаси ҳақида фикрини билдирди.

Португалия миллий жамоаси Миллатлар Лигаси 1/4 финал жавоб баҳсида Данияни 5:2 ҳисобида мағлуб этиб, яримфиналга чиқди. Биринчи бўлимда Роналду пеналти ишлаб, уни амалга ошира олмади.

«Португалияликлар одатда охиригача сабр қилишади. Ўйин олди ўтказилган матбуот анжуманида мухлислар биз билан бўлса, майдонда ҳар қандай ишга қодирлигимизни айтгандим.

Мен хатога йўл қўйган пеналтимдан сўнг ҳам кейинги босқичга ўтамиз, деб ҳис қилгандим – ва шундай бўлди. Чунки пеналтини голга айлантира олмаганимдан кейин ҳам яримфиналга чиқишимизга ишонгандим. Бу ажойиб оқшом бўлди, Португалия жуда яхши ўйнади; Дания дарвозасига бешта гол уриш осон эмас.

Биз ҳаммамиз эътирофга лойиқмиз: ўйинчилар, стадионда бўлганлар ва барча португалияликлар. Биз ҳаммамиз бир қайиқдамиз ва ярим финалга чиқиш биз учун жуда муҳим эди», – деди «Ан-Наср» ва Португалия миллий жамоаси ҳужумчиси Криштиану Роналду NOW нашрига.