Ўзбекистон миллий жамоаси яримҳимоячиси Жалолиддин Машарипов 90minutUz подкастида иштирок этиб, Қирғизистон билан ўйиннинг 24-дақиқасида рақиб ҳимоячиси Саид Дациевга кўрсатилган қизил карточкани кўрмай қолганини маълум қилди.

Миллий жамоамиз етакчиларидан бири ўша вазиятда рақиб футболчисининг қўполлик ишлатгани боис, вазиятдан бехабар қолганини айтиб ўтди.

«Битта нарсани айтаман, 86-дақиқада алмаштирилганимдан кейин захира ўриндиғида ўтиргандим, Ҳожимат Эркинов «ака, яхшиям улар қизил олди» деб айтиб қолди. Ҳайрон қолиб, дарҳол «ким қизил олди?» дедим. Пеналти бўлган вазиятда билмадим ҳам, кўрмагандим ҳам вазиятни. Ўша пайтда зарба бераётганимда ётиб қолганимда кўрмай қолган эканман. Чунки ерга қараб ётиб қолгандим.

Ўйиндан кейин душда турганимизда Элдорга «улар ўйинда қизил олган экан» десам, у ҳам ҳайрон қолиб, «ким қизил олди, қачон қизил олди?!» деди. Элдор ҳам қизил берилганини билмасакан. Биз ўн бирга ўн бир ўйнадик деб ўйлагандик. Элдор ҳам, мен ҳам билмаган эканмиз.

Танаффусда бош мураббий қизил карточкадан келиб чиққан ҳолда тактикани ўзгартирмадими? Четлатиш ҳақида гап очилмади, Темур ака нималарнидир айтди, лекин қизил бўлганини ҳеч ким айтмади. Мен захирага олинганимдан кейин билдим, Элдор ўйин тугагунча билмаган экан, ўйиндан кейин, душда билди.

Билганимизда бошқача бўлармиди? Билганимизда сал бўшашардик-да! Агар билганимда биринчи навбатда Темур акага “бир ҳимоячини олиб ташлаб, олдинга ҳужумчини қўйинг» дердим», - дея гапирган Жалолиддин Машарипов подкастда.

Эслатиб ўтамиз, Жалолиддин ушбу учрашувда сариқ карточка олиб, Эрондаги учрашувни ўтказиб юборадиган бўлди.