«Бавария» собиқ яримҳимоячиси Франк Рибери 2013 йилги «Олтин тўп» соврини футболдаги катта адолатсизликлардан бири бўлганини яна бир маротаба таъкидлади.

Ўшанда овоз бериш натижаларига кўра, франциялик футболчи учинчи ўринни эгаллаган. Мукофотни «Реал» ҳужумчиси Криштиану Роналду қўлга киритган бўлса, «Барселона»нинг собиқ юлдузи Лионел Месси иккинчи ўринни эгаллаган.

«Ўша мавсум мен учун мукаммал ўтганди. Йилни бундан яхшироқ ўтказа олмасдим. 2013 йилги «Олтин тўп» соврини мен ва футбол учун учун ҳар доим адолатсизлик бўлиб қолади. Ҳалигача бу ҳолатга тушунтириш топа олмайман.

Нима учун овоз бериш муддати икки ҳафтадан кўпроққа узайтирилганини ҳеч қачон тушунмайман.

Месси ва Роналду менга доим ҳурмат билан муносабатда бўлишган. Лео ва Криштиану менинг улар билан бир хил даражада эканимни билишарди. Уларга ҳурматни сақлаган ҳолда айтаман – 2013 йилда улар мендан яхшироқ эмасди», – деди Франк Рибери L’Équipe нашрига берган интервьюсида.