Рафиня Диас ва Роналд Араухо «Осасуна»га қарши ўйинда иштирок этишлари мумкин.

Уругвай миллий жамоаси 25 март куни ЖЧ-2026 саралаш босқичида Боливияга қарши майдонга тушади. Ушбу учрашув Тошкент вақти билан 01:00 да бошланади. Бразилия миллий жамоаси эса 26 март куни соат 05:00 да Аргентинага қарши ўйнайди.

«Барселона» Ла Лиганинг 27-туридан қолдирилган учрашувни 27 март куни «Осасуна»га қарши ўтказади. Шунинг учун Рафиня ва Араухо миллий жамоалар ўйинларидан сўнг ушбу беллашувда ҳам қатнашиши мумкин.

Diario Sport нашрининг хабар беришича, режага кўра, бу футболчилар Испанияга хусусий самолётда қайтишади. Улар билан бирга «Реал» ва «Атлетико»да тўп сураётган футболчилар ҳам бўлади. Бу рўйхатга Хосе Хименес, Федерико Валверде, Науэл Молина, Родриго Де Пол, Анхел Корреа, Хулиан Алварес, Эндрик ва Винисиус Жуниор ҳам бор.

Уругвайнинг Боливияга қарши ўйини Аргентинанинг Бразилияга қарши ўйинидан бир неча соат олдинроқ тугайди. Бу эса уругвайликларга Буэнос-Айресга етиб бориш имкониятини беради, айнан шу шаҳардан Мадридга самолёт парвози режалаштирилган.

Буэнос-Айресдан Рафиня ва Араухо Барселонага учиб келишади ва чоршанба куни кечга яқин Каталония пойтахтига етиб келишлари кутилмоқда. Ушбу ўйинда улар захирадан ўйинга қўшилишлари мумкин.

Маълумот учун, Буэнос-Айресдан Мадридгача самолёт 12 соат атрофида парвоз қилади.