Португалия миллий жамоаси бош мураббийи Роберто Мартинес Миллатлар Лигаси чоракфинали биринчи ўйинида Даниядан (0:1) учралган мағлубиятдан сўнг ўз фикрларини билдирди. 

«Бу бизнинг сўнгги 2 йил ичидаги энг ёмон ўйинимиз эди. Гап ўйин режасида эмас, биз агрессив муҳитда ўзимизни кўрсата олмадик. Аммо шунга ўхшаш учрашувлар ҳам керак. Дания самарали ўйнади, Диогу Кошта бизга жавоб ўйинига ишонч билан боришга имкон берди. Энди биз мухлисларимизга муҳтожмиз.

Бизга кучли интенсивлик етишмади, ўз даражамизда ўйнамадик. Дания бизни кўп жабҳада ортда қолдирди. Миллатлар Лигасининг чоракфиналига етиб келдик, аммо бугун рақибга ҳисоб очишга ва қарши ҳужумларга уюштиришга имкон бердик, тўпни тез-тез йўқотдик. Бизда яна бир имконият бор ва ўз даражамизни намойиш этиш учун мухлисларимиз керак.

Ўйинни назорат қилишимиз керак эди. Дания тезкор ҳужумларни амалга ошириш ва марказда тўрт ёки беш ўйинчини жойлаштириш бўйича аниқ режага эга эди.  Ренату Вейга, Рубен Диаш ва Диогу Коштанинг ишончли ўйини жавоб баҳси олдидан бизни курашда қолдирди», — дея испаниялик мутахассиснинг сўзларини келтиради A Bola.