Мексиканинг «Леон» клуби клублар ўртасидаги Жаҳон чемпионатидан клуб мулкдорлиги қоидаларини бузгани учун четлатилди.

Гап шундаки, «Леон» ва «Пачука» клублари Grupo Pachuca компаниясига тегишли. Қоидаларга кўра, бир мулкдор ёки бир юридик шахсга тегишли клублар бир мусобақада иштирок эта олмайди.

Мексиканинг иккила жамоасига нисбатан интизомий тергов бошланди ва иш ФИФАнинг апелляция қўмитасига топширилган.

«Далиллар ўрганиб чиқилгандан сўнг, ФИФА апелляция қўмитаси «Пачука» ва «Леон» клубларини регламентнинг жамоага эгалик қилиш талабларига мос келмаслигини аниқлади», – дейилади ташкилот баёнотида.

«Леон» клублар ўртасидаги жаҳон чемпионатидан четлатилди. Мексика клуби ўрнига қайси жамоа иштирок этиши кейинроқ эълон қилинади. Колумбиялик Хамес Родригес айни дамда ушбу жамоа шарафини ҳимоя қилмоқда.

Маълумот учун, клублар ўртасидаги жаҳон чемпионати АҚШда ўтказилади. Мусобақа 2025 йил 15 июнда бошланиб, 13 июлда якунланади.