Ўзбекистон – Қирғизистон ўртасидаги ўйин олди матбуот анжуманида миллий жамоамиз бош мураббийи Темур Кападзе ва яримҳимоячи Одил Ҳамробеков иштирок этди.

«Қизиқарли учрашув кутиб турибди. Ўйиннинг қай даража муҳимлигини ҳам тушуниб турибмиз. Ўйинга тайёргарлигимиз яхши бўляпти. Уйда мухлислар қаршисида улар билан бирга рақибни мағлуб этишга ҳаракат қиламиз. Ўйлайманки ҳаммаси жойида.

Қирғизистонга қарши футболчилик фаолиятим даврида ҳам кўп марта тўқнаш келганмиз. Ўйинларда устун ҳам келганмиз. Ҳозирги кунда Қирғизистонда ҳам футбол анча ривожланди, бу кўриниб турибди. Ўйлайманки, эртага яхши ўйин гувоҳига айланамиз.

Ўйинга яхши тайёргарлик кўра олдикми? Вақт зиқ, шунга қарамай тайёргарлик кўряпмиз, ҳозир сўнгги машғулотни ўтказамиз. Ҳамма соғ-саломат. ФИФА кунларини белгилаш бизнинг қўлимизда эмас, футболчилар эртароқ келишса яхши бўларди. Шунга қарамай, ҳамма ўйинчилар профессионал, улар ҳаммасини тушуниб майдонга тушади.

Ҳусниддин Алиқуловнинг йўқлиги? Футболда ҳеч нарсани олдидан тахмин қилиб бўлмайди, ўйинчилар ўйинда, машғулотларда жароҳат олиб қолиши мумкин. Ҳар бир ўйинчини ўрни бор, аммо қолган футболчилар Ҳусниддиннинг ўрнини билинтирмайди деб ўйлайман. Бу муаммо бўлмаслиги керак.

Ҳожимат Эркинов? Остон Ўрунов машғулотларда ўзини яхши ҳис қилмади, шу боис кеча машғулотларни тарк этди. Унинг ўрнига Ҳожиматни чақириб олдик. Бугун эртага вазиятга қараймиз ва бир қарорга келамиз.

Ҳусановнинг «Сити»га ўтиши? Бу нафақат миллий жамоа ўйинчилари учун, ҳар бир ўзбекистонлик ёш ўйинчилар учун ҳам катта мотивация беради.

Олимпиадага йўлланмани қўлга киритган биринчи мураббий эканим тарихда қолди. Ҳозир олдимга қўйилган муҳим вазифам бор. Жамоамиз билан бирга бу вазифани уддалашимиз керак. Ҳаммаси ўз қўлимизда. Керакли очколарни жамғарсак, гуруҳдаги бошқа ўйинларга эътибор қаратишга ҳожат қолмайди. Энг муҳими шу.

Асосий эътиборимиз эртанги баҳсга қаратилган. Ўйин қандай кечишидан қатъи назар, рақибга имкон қолдирмаслик ва ғалаба қозониш учун ҳаракат қиламиз. Насиб бўлса, мухлисларимиз олдида юзимиз ёруғ бўлади.

Бошқа рақибларнинг ҳийласи? Тўғрисини айтсам, менга у ерда нима бўлаётганини қизиғи йўқ. Чунки ҳаммаси ўзимизнинг қўлимизда. Ўз очкомизни олсак кифоя. Улар ҳам бизнинг ўрнимизга чиқишни хоҳлашади, шу боис турли ишлар қилиши мумкин. Бу уларнинг муаммоси. Хурсанд қиладигани барчаси ўз қўлимизда», - дея Темур Кападзенинг сўзларини келтиради Tribuna.uz мухбири.

Маълумот учун, Ўзбекистон – Қирғизистон учрашуви 20 март куни соат 21:00да бошланади.