Қирғизистон миллий жамоаси ҳужумчиси Жоэл Кожо Tribuna.uz мухбири билан суҳбатда Ўзбекистонга қарши эртанги ўйин ҳақида фикрини билдирди.

«Эртанги ўйин икки мамлакат жамоаси учун ҳам жуда муҳим саналади. Қолаверса, гуруҳ босқичининг ҳам катта учрашувларидан бирига айланади. Шундай экан, эртанги ўйинда барчамиз энг яхши жиҳатларимизни майдонда кўрсатишга тайёрмиз.

Бу – икки жамоа учун ҳам финалдан-да каттароқ ўйин. Шундай экан, эртага Яратган бизга нималарни тайёрлаб қўйганини кўрамиз. Ҳозир барчамиз учун муҳими – барча соғ-саломат бўлиб майдонга тушиши», - дейди Қирғизистон миллий жамоаси форварди Tribuna.uz мухбири билан суҳбатда.

Эслатиб ўтамиз, Кожо йил бошида «Динамо»дан Эроннинг «Истиқлол» клубига 300 минг АҚШ доллари эвазига трансфер қилинганди.

Маълумот учун, А гуруҳида Эрон 16 очко билан пешқадамлик қилаётган бўлса, Ўзбекистон 13 очко билан 2-ўринда бормоқда. Қирғизистон эса 3 очко билан 5-ўринни эгаллаб турибди.