Ламин Ямал Испания миллий жамоаси сафида ҳам Рамазон ойини тўлиқ адо этмоқчи, дея ёзмоқда Marca нашри.

Манба хабарига кўра, «Барселона» ва Испания миллий жамоаси вингери Ламин Ямал Рамазон ойида рўза тутишга қарор қилган. Испания миллий жамоаси мураббийлар штаби 17 ёшли футболчи билан илк марта шундай ҳолатга дуч келган – 2024 йилда ҳам Рамазон ойида миллий жамоа ўйинлари тўғри келган, аммо ўшанда Ямал рўза тутмаганди.

Қайд этилишича, бунгача Адама Траоре ва Ансу Фати сингари ўйинчилар ҳам миллий жамоа сафида рўзадор бўлган.

Аввалроқ, «Барселона» клуби тиббий бўлими рўза тутаётган Ламин Ямал учун алоҳида овқатланиш ратционини тузгани, бу орқали футболчининг жисмоний ҳолатини юқори даражада сақлаб қолишга эришилаётгани хабар қилинганди.

Маълумот учун, Испания Миллатлар лигаси чоракфинали доирасида 20 ва 23 март кунлари Нидерландияга қарши майдонга тушади.