Суперлига 2-тури доирасидаги «Андижон» - «Насаф» учрашуви томошабинлар ташрифи бўйича янги мавсум рекордини қайд этди.

Ўзбекистон профессионал футбол лигаси Суперлига 2-тур якунларига кўра, учрашувларни томоша қилиш учун стадионга тушган мухлислар сонини эълон қилди. Унга кўра, Андижондаги учрашув мавсум рекорди сифатида қайд этилди.

«Андижон» ва «Насаф» (1:1) ўртасида ўтган баҳсни кузатиш учун «Бобур арена» стадионида 17 минг томошабин ташрифи кузатилган. Шу куни ўйингоҳ мухлислар билан лиқ тўлган. Бу жорий мавсумда ҳозирча энг яхши кўрсаткичга айланди.

Шунингдек, Фарғонада ўтган «Нефтчи» ва «Қўқон-1912» (0:0) ўртасидаги дербида «Истиқлол» стадионига 10 250 томошабин ташриф буюрган.

Самарқандда ўтган «Динамо» ва «Машъал» (1:0) ўртасидаги очилиш ўйинида эса 8 150 томошабин ташрифи кузатилган. Бу турдаги учинчи энг яхши кўрсаткич бўлди.

3 йиллик танаффусдан кейин Термизга футбол баҳори қайтишини 6784 томошабин кузатган бўлса-да, янгиланган аренадаги илк ўйинда мезбон «Сурхон» «Хоразм»га ютқазди (0:2).

Олмалиқда ўтган ОКМК ва «Пахтакор» ўртасидаги марказий баҳсни (2:0) 4812 томошабин, Жиззахда кечган «Сўғдиёна» - «Навбаҳор» (2:3) ўйинини 4506 томошабин кузатиб борди.

Тошкентда ўтган «Бухоро» - «Қизилқум» (2:0) ўйини (1011 томошабин) ва Қаршида ўтказилган «Шўртан» - «Бунёдкор» (0:2) баҳси (543 нафар томошабин) турнирнинг энг кам томошабин йиққан ўйинлари бўлди. Қайд этиш жоиз, ушбу баҳсларда мезбон жамоалар ўз майдонида эмас, бошқа стадионда тўп сурди.