«Тоттенҳэм» Тимо Вернерни «Лейпциг»дан сотиб олмасликка қарор қилди.

29 ёшли ҳужумчи Англия Премер-лигасининг 18 ўйинида 3 голга ассистентлик қилди. Умуман барча турнирлар доирасида эса 27 та баҳсда атиги 1 та гол урди — Лига Кубогида «Ман Сити» дарвозасига. 

«Шпорлар» германиялик футболчини ўтган мавсумда «буқалар»дан ижарага олиб, ёзда келишув муддатини узайтирганди.

Флориан Плеттенбергнинг ёзишича, «Тоттенҳэм»да Тимони 12 млн еврога сотиб олиш ҳуқуқи бор, аммо лондонликлар бундан фойдаланмоқчи эмас. 

Ҳужумчи Германия клубига қайтади. Унинг «Лейпциг»даги келажаги бош мураббий Марко Розенинг қолиш-қолмаслигига боғлиқ бўлади. Вернернинг немис клубидаги маоши йилига 10 млн еврога тенг.

Айни пайтда Вернер Бундеслига клубига ўтишни хоҳламайди. Унда Премер-лига ва МЛС клубларидан аниқ таклифлар мавжуд.