УЕФА расмий сайти Чемпионлар лигаси 1/8 финал жавоб ўйини доирасидаги «Атлетико» ва «Реал» ўртасидаги учрашувдан кейинги пеналтилар сериясида бекор қилинган гол бўйича баёнот берди.

«Реал» «Атлетико»ни мағлуб этиб (2:1, 0:1, 4:2 – пен) чоракфиналга чиқди.

Пеналтилар сериясида «Атлетико» ҳужумчиси Хулиан Алварес гол ургач, бош ҳакам Шимон Марчиняк VARга мурожаат қилиб, аргентиналик ҳужумчи зарба бераётганда тўп унинг икки оёғига ҳам текканини қайд этди ва голни бекор қилди.

Мадриддаги ўйиндан кейин «Атлетико» ушбу ҳолат бўйича УЕФАга мурожаат билан чиқди.

«Алварес зарба йўллаган пайтда кичик контакт бўлса-да, футболчининг таянч оёғи тўпга тегди ва гол бекор қилингани тўғри қарор.

14.1 – бандидаги қоидага биноан, VAR бу вазиятда голни бекор қилиш бўйича бош ҳакамга хабар бериши тўғри эди.

УЕФА ушбу вазиятни ФИФА ва IFAB билан муҳокама қилади ва зарба йўллаётганда оёқнинг тўпга икки марта тегиниши яққол кўринмаган бўлса, қоидани ўзгартириш масаласини муҳокамага қўяди», - дейилади ташкилот хабарида.