«Пахтакор» бош мураббийи Педру Морейра Элит ОЧЛ 1/8 финали доирасидаги «Ал Ҳилол» (0:4) билан ўйиндан сўнг ўз фикрларини билдирди. 

«Стадионда ажойиб муҳит бўлди. Рақибнинг даражаси юқори эканини билардик, бугун улар жуда яхши ўйнашди. Биз тўпни кўп йўқотдик. Ўз даражамизни яхшилаш учун ишлашимиз керак. Иккинчи голни қарши ҳужумдан ўтказиб юбордик. Иккинчи бўлимда ҳужумда фаолроқ бўлдик. Ўйиннинг биринчи қисмида буни уддалай олмадик. Тан олиш керак, рақиб ғалаба ва натижага муносиб футбол кўрсатди. Биз шундай юқори даражадаги беллашувларга тайёр бўлишимиз лозим.

«Ал Ҳилол»нинг кучли тарафларини билардик, қанотдан жуда фаол олдинга ўтишади. Марказдан қанот ҳимоячиларини ҳужумга бошлашади. Ўйин суръатига дош бера олмадик. Биз янги жамоа қуриш босқичидамиз, таркибимизда ўтган йилга нисбатан ўзгаришлар катта. Тошкентда ишонч билан ҳаракат қилгандик.

Баҳс бошида кўп хатолар қилдик. Рақиб футболчиларини ўйинчиларимиз билан бирга-бир қолишга кўп қўйиб бердик. Лекин уюшқоқ ўйнадик деб ўйлайман, фақат кераксиз хатолар кўпайиб кетди. Рақиб сафида юқори савияли футболчилар кўп ва улар маҳорат кўрсатишди. Таркибимизда Кайо Сезар бўлса, биз ҳам жуда яхши футбол ўйнашимиз мумкин.

Бу ўйинлардан хулоса чиқарамиз, ўзимизга тегишли фойдали жиҳатларга эга бўламиз. Лекин Суперлигада бошқача футбол ўйнаймиз. Стадионда бизни ажойиб тарзда қўллаб турган мухлисларга катта ташаккур. Улар камчилик бўлишса-да, жуда фаол қўллашди. Уларни чемпионатдаги учрашувларда ҳам кутиб қоламиз.

Ушбу босқичгача етиб келишимизни кичик натижа деб аташ мумкин. Шу босқичда бўлишга ҳақли эдик. Тўрт учрашувдан кейиноқ жуда юқори савияда ўйнаш иложсиз», — дея португалиялик мутахассиснинг сўзларини келтиради клуб матбуот хизмати.