«Ювентус» мухлислари «Аталанта» билан ўйинда клуб раҳбарлари ва футболчиларга қарши ҳуштакбозлик қилишди.

«Ювентус» ўз уйида «Аталанта»дан жавобсиз 4 бор тўп ўтказиб юборди. Бу — Турин клубининг 1967 йилдан бери Италия чемпионатида уйдаги энг йирик мағлубияти. 

Биринчи бўлим 0:1 ҳисобида якунланди ва мезбон мухлислар танаффусдаёқ ҳуштак чалишни бошлашди. Иккинчи бўлимда «Аталанта» ҳисобдаги фарқни оширгач, туринлик мухлисларининг ҳуштаги янада баландроққа янгради. 

Улар клуб раҳбариятига турли қичқириқларни айтишди. Жумладан: «Уят сизларга!», «Раҳбарият, сизлар бизни қутуртиряпсиз! Рангларимизни ҳурмат қилинг!»

Баҳс якунига яқин стадион деярли бўшаб қолди. Финал ҳуштагидан сўнг увиллагашлар бўлди.