Кун Кастелс Тибо Куртуанинг қайтиши фонида Белгия миллий жамоасидан кетганини эълон қилди.

Аввалроқ Белгиянинг янги бош мураббийи Руди Гарсия кейинги ўйинлар учун Куртуани жамоага чақиришини тасдиқлаганди. «Реал» дарвозабони аввалги мураббий Доменико Тедеско билан зиддият туфайли 2023 йил ёзидан бери жамоада ўйнамаётганди. 

«Биринчидан, Куртуанинг қайтишга қарор қилгани ва федерация ўз фикрини ўзгартиргани ғалати. Барчамиз тенгмиз ва ҳеч биримиз жамоадан устун эмасмиз. Ҳозирчага шундай эди, аммо энди федерация Тибога қизил гилам ёйди.

Яқинда мен Куртуанинг Тедесконинг истеъфоси ҳақида гапирганини эшитдим ва мураббий тўғри қилганига амин бўлдим. Менимча, бу Тибонинг ўзини айбдор ҳис қилишини англатади. Мен стандартлар ва қадриятларга амал қилмайдиган, бундай хатти-ҳаракатларга кўз юмадиган федерациянинг бир қисми бўлолмайман.

Бугундан бошлаб миллий жамоа учун ўйнамайман. У ерга соф виждон билан боролмайман. Кўплаб футболчилар бунга рози эмас. Бу нафақат Куртуа ва Тедеско ўртасидаги воқеа ҳақида, балки оғриқли бошқа муаммолар ҳам бор», — дейди «Ал Қодисия»да ўйнаётган посбон.