Қозоғистон миллий жамоаси бош мураббийи вазифасини бажарувчи Али Алиев «Челси» клубига ўтгани хабар қилинган қозоғистонлик 16 ёшли Достон Сатпаевни Абдуқодир Ҳусанов билан таққослади.

«Достонни Ҳусановдан кўра кучлироқ деб ҳисоблайман. Ҳусанов ҳимоячи сифатида, Достон ҳам тўғри муносабатда бўлса унинг генетикаси жуда кучли. Сатпаев – атлет, унга Европа даражасида ривожланиши ва ўсиши учун шунчаки туртки керак.

Ҳозирда «Реал» сафида туркиялик Арда Гюлер бор, бразилиялик Эндрик бор, Достон эса фақатгина Қозоғистон паспортига эга экани сабаблигина улар даражасидаги эътиборга тушмаган. Халқаро майдонда у бу вазиятдан унумли фойдаланиши мумкин», - дейди қозоғистонлик мураббий Meta-ratings.kz сайти мухбири билан суҳбатда.

Эслатиб ўтамиз, Алиев яқинда Қозоғистон миллий жамоасидан истеъфога чиқарилган Станислав Черчесов ўрнига бош мураббий вазифасини бажарувчи этиб тайинланганди.

Маълумот учун, «Қайрат» клуби ва Қозоғистон ўсмирлар жамоасининг 16 ёшли яримҳимоячиси Достон Сатпаев «Челси» клуби томонидан 4,3 миллион еврога трансфер қилингани, футболчи 2026 йилда вояга етгач, Лондон клубига ўтиши ҳақида хабар қилинганди.