Бугун, 27 феврал куни Испаниядаги бокс оқшомида ўзбекистонлик Олимпиада чемпиони Абдумалик Халоков профессионал боксдаги иккинчи жангида рингга кўтарилди.

Париж-2024 Олимпиадасининг 24 ёшли ғолиби Севилядаги «Centro Deportivo San Pablo» бокс кечасида Венесуэла вакили Марлемброн Акунядан устун келди. 6 раунддан иборат жангнинг 3-раундида ҳакамлар Халоковнинг техник нокаутини қайд этишди. Бунгача Халоков жанг давомида рақибини уч марта нокдаунга учратганди. Ушбу ғалаба Абдумаликнинг профи боксдаги иккинчи ғалабасига айланди.

Маълумот учун, Акуня бунгача 25 жанг ўтказиб, 13 ғалаба, 11 мағлубият ва битта дуранг қайд этганди. 2023 йилги жаҳон чемпиони саналадиган Абдумалик 2 жангда 2 ғалабага эришди.