Фаолиятида мингта гол уришни мақсад қилган Криштиану Роналду Садио Манега пеналтини тепишга имкон берди.

«Ан-Наср» жамоаси сешанба оқшомида Саудия Арабистони чемпионатида «Ал-Ваҳда» устидан 2:0 ҳисобида ғалаба қозонди. Португалиялик ҳужумчи ушбу баҳсда ҳисобни очгач, 90+10-дақиқада пеналти ишлади. Ушбу вазиятда барча 40 ёшли форварднинг фаолиятидаги 926-голини уришини кутаётган пайтда Роналду 9та ўйиндан буён гол ура олмаётган жамоадоши Манега тўпни топширди. Сенегаллик футболчи пеналтини голга айлантирди.

Португалиялик форвард ўйиндан кейин мухлисларни Мане қўллаб-қувватлашга чақирди.