«Манчестер Сити» Премер-лиганинг навбатдаги мавсумини кечиктиришни таклиф қилди, деб ёзади The Times. 

«Шаҳарликлар» ижрочи директори Ферран Сориано жума куни бўлиб ўтган йиғилишда юқоридаги таклифни киритган ва бунга клублар ўртасидаги жаҳон чемпионатидан сўнг футболчилар дам олиши кераклигини сабаб қилиб келтирган. 

Бироқ АПЛ чемпионининг позициясини ҳеч ким қўллаб-қувватламади. Бир клубнинг исми ошкор этилмаган вакили жаҳон чемпионатида иштирок этиш мажбурий эмаслигини таъкидлаб, «Сити» турнирдан фойда оляптими, демак, минусларга ҳам тайёр бўлиши кераклигига киноя қилган.

Маълумот учун, янги форматдаги клублараро жаҳон чемпионати 2025 йил 15 июндан 13 июлгача АҚШда бўлиб ўтади. Турнирда 32 жамоа иштирок этади. АПЛ янги мавсуми эса августнинг ўрталарида старт олади.