«Манчестер Сити» бош мураббийи Хосеп Гвардиола «Нюкасл»га (4:0) қарши баҳсда жамоадаги илк тўлиқ ўйинини ўтказган ўзбекистонлик ҳимоячи Абдуқодир Ҳусанов ҳақида гапирди. 

«Ҳусановга «Челси»га қарши осон бўлмаганди. Чунки Ўзбекистон ва Франциядан келибоқ АПЛда ўйнаб кетиш осон эмас. Аммо у келажакда буюк футболчига айланиши мумкин. Бу — унинг учун, биз учун ҳам жуда яхши ҳолат. Унинг потенциали кўриниб турибди. 

Ҳусанов бирга-бир вазиятларда агрессив ўйнайди, тўп билан яхши муомала қилади ва жуда юқори тезликка эга. У қарор қабул қилиш кўникмасини ривожлантириши керак. Буниси — энди ёш билан боғлиқ масала. 

У майдон ташқарисида тортинчоқ, кўп гапирмайди. Аммо, албатта, келажакда жамоага кўп ёрдам бера олади», — дейди испаниялик мутахассис матбуот анжуманида.