«Порту»нинг собиқ раҳбари Жорже Пинту да Кошта вафот этди.

Португалия клубининг собиқ президенти 87 ёшда эди ва саратон касаллиги билан курашаётганди. Унинг аҳволи сўнгги ҳафталарда ёмонлашди. 

Пинту Да Кошта 42 йил давомида — 1982 йил апрелдан 2024 йил майгача «Порту»га раҳбарлик қилди. Унинг қўл остида клуб 69 та соврин ютди, шу жумладан, Чемпионлар Кубоги-1986/87 ва Чемпионлар Лигаси-2003/04да зафар қучди. 

Ўтган ёзда «Порту» президентлигига Андре Виллаш-Боаш сайланганди.

Да Кошта вафот этганини эшитган жамоанинг собиқ устози, ҳозирда «Милан» бош мураббийи ҳисобланган Сержиу Консейсау «Верона» (1:0) билан ўйиндан кейинги матбуот анжуманига кирмади. 

«У кийиниш хонасига жуда хафа кириб келди. «Порту» президенти унга отасидек эди», — деди «россонери» маслаҳатчиси Златан Ибраҳимович.