«Ливерпул» ҳимоячиси Виржил ван Дейк АПЛ 15-туридан ўрин олган «Эвертон» (2:2) билан ўйинда юзага келган жанжал ҳақида гапирди. 

Баҳс тугаши билан мезбонлар яримҳимоячиси Абдуллае Дукуре «Ливерпул» мухлислари секторига қараб югурди. Шундан сўнг «қизиллар» ҳавбеки Кертис Жонс Дукурени турта бошлади ва можарога ҳар икки томон аралашди. Якунда жанжал бошлаган икки ўйинчига ҳамда «Ливерпул» устози Арне Слотга қизил карточка кўрсатилди. 

«Ўйлайманки, бугунги ўйинда ҳакам катта рол ўйнади, чунки баъзи қоидабузарликлар фол каби қайд этилди, аммо мантиқан ундай эмасди. 

Рақиб голни нишонлаш ҳуқуқига эга, аммо Дукуре мухлисларимизга провокация қилди ва Кертис (Жонс) буни нотўғри деб ҳисоблади. Кейин жанжал юзага келди.

Ҳакам ўйинни назорат қилмади, мен унга бу ҳақда айтдим. Бу таъсир кўрсатди. Иккала жамоа ҳам буни енгиб ўтишига тўғри келди», — дея нидерландиялик ҳимоячининг сўзларини келтиради Sky Sports.