«ПСЖ» бош мураббийи Луис Энрике ЕЧЛ ўтиш босқичидаги «Брест»га (3:0) қарши баҳсдан сўнг ўз фикрлари билан ўртоқлашди. 

«Натижадан мамнунман. «Брест» — бизга сўнгги 5 ўйинда 8 та гол урган жамоа. Менга ҳамжиҳат ҳаракат қилганимиз ёқди. Улар, айниқса, бурчак зарбасидан кейин гол уришлари мумкин эди. Биз омадли эдик. Натижа «Брест»нинг ўйинини акс эттирмайди.

Рақамларнинг ўзи гапиради. Бизда барқарорлик мавжуд, бу орқали жамоа янада яхшиланади. «Брест» муаммолар келтирди, аммо биз яхши ҳимояландик. Жамоамиз ҳужум учун яратилган.

Энди бизда жуда яхши сериялар бор. «Манчестер Сити» (4:2) билан ўйин бизни очиб юборди, ишонч максимал даражада. 

Жавоб баҳсини машғулотдек қабул қилмаймиз. Улар бизга сўнгги 5 та ўйиннинг иккитасида 2 тадан гол уришган. Мақсадимиз — жавоб ўйинида ҳам ғалаба қозониб, 1/8 финалга чиқиш. Бунга эришамиз.

Витиня? У ноёб. Таянч зонасида муҳим ўрин эгаллайди. У катта фойда келтиради, жисмонан ва ақлий жиҳатдан кучли. У — мукаммал яримҳимоячи. 

Кетма-кет 8 ўйинда гол урган Дембеле? Ундан Рождествода нималар еганини сўраш керак. У ўзига тўлиқ ишонади. Усмон ўтган мавсумда ҳам яхши эди, аммо 2025 йилда янада яхшиланди. Жамоадошлари майдонда уни излаётгани ва топаётганини кўриш мумкин», — дея испаниялик мутахассиснинг сўзларини келтиради RMC Sport.