Англия кубоги 1/16 финал босқичида «Манчестер Сити» Лондонда «Лейтон Ориент» меҳмони бўлиб, камбэк эвазига кейинги босқичга йўлланма олди. Абдуқодир Ҳусанов учрашувнинг энг яхши ўйинчиларидан бири деб топилди.

Sofascore халқаро статистик портали «Сити»нинг ғалабаси (2:1) билан якунланган ўйиндан кейин футболчилар ҳаракатини баҳолаган. Унга кўра, 2-бўлимда захирадан майдонга тушиб, ҳисобни тенглаштирувчи гол муаллифига айланган Абдуқодир Ҳусановнинг ҳаракатлари 10 баллик тизимда 7,8 баллга баҳоланган. Бу борада фақатгина Грилиш (8,5) ва О`Райли (8) ўзбекистонлик ҳимоячидан юқорироқ баҳо олди. Улар асосий таркибга тушганди.

Эслатиб ўтамиз, «шаҳарликлар» 11 феврал куни ЕЧЛ ўтиш ўйини доирасида Манчестерда «Реал»га қарши майдонга тушади.